Ergänzige

So, mir isch vori im Bus ufm Heiwäg no viu i Sinn cho woni geschter ha vergässe....ok, vilich ni viu aber ämu paar Sache.

Weni im Bus hocke für hei (di ganzi Strecki geit öppe 25 Minute) muesi dür z'gröschte Ghetto fahre. Scho die womi vom Flughafe hei hie härebracht hei gseit ig söui ja nie usstige dert. S'isch öppe ä 3km längi Strass u s'isch ä Mischig zwüsche Bümpliz-Ghetto, Bern-Rithaue u Bundeshusplattform - u zwar deftig. Di hi hie richtig ihri Penner-Junkie-Kolonie. Di si vou organisiert mit ihrne Ichoufswägeli u so - irgendwie gsehts scho fasch härzig us ;-) - nei ke Seich. Aber när weme hie usse isch isch super. S'chunnt eim chli vor wi SanFrancisco - weni hei chume bini vou trainiert, ig gheiä obe aube fasch tod um wüui so wit mues ufeloufe - für häre geits zum Glück abe, hätt süsch scho dr Bus vrpasst ;-).





Hüt hani nachdr Schueu ä Tour dür Downtown gmacht....blöderwis hani vorhär no viu Wasser gchouft u ha das di ganz Zit müessä mitschleppä - näbscht dä Schueubüecher u so. A propos Wasser, ds isch hie wäuts tüür...ä Liter choschtet 2.99$....mues afa Leitigswasser trinke. Si sägä zwar au mä chönns trinke u d'Kanadier trinkes ou au, aber s'het eifach chuscht wi wed im Hauebad usem Becki würdsch trinke....mues das äuä lehrä hie weni ni wott pleite ga.




Ja äbä, när hani mini Tour gmacht u ha natürlech wäuts wit müessä loufe wüui nume ei Hautsteu kennä wo mi Bus fahrt - die bir Schueu u bi öppe am angerä Änd gsi när. Aber ha de ä nöii Station gfunge u bi ämu guet heicho. Z'Busnetz hie isch rächt kompliziert u ig gloub nimau d'Iwohner chöme rächt drus u da ig ja süsch eh z'dick wirde vo däm vile Ässä tuets gloub guet chli z'loufe.

Ir Schueu bini eifach öppe di jüngschti i mim Level. Mir si zwüsche 5 u 12 Lüt i mire Klass u au angerä si zwüsche 28 u 40i - s'het Ärztinne u Awäutinne, Wirtschaftsinformatiker usw. Aber si si au rächt nätt u näme mi ou immer mit - blibtne ja nüt angers übrig ;-).

D'Lehrer si drfür rächt kuul....eifach chli wirr, aber mir heis aube u luschtig.

Am Friti gits hie i mim Homestay none Kindergeburi-Party....d'Zwillinge hei Geburtstag u s'si 20 Ching iglade - wahrschinlech bini de denn zuefälligerwis ni deheim. Scho di drü älei si wäuts lut, we när 20 Ching hie si hautetmes äuä ni us....