Vancouver Police Department

Hüt am Nami heimer anstatt Schueu ä Tour mitm Vancouver Police Department gmacht. Isch super gsi, si mitme Polizischt dür Vancouver glüffe u dä hetnis aui wüeschtä Plätz zeigt u denä ihri Gschicht verzeut (u s'si wük Plätz wo niemer vo üs häre wär we ke Polizischt drbi gsi wär - nimau tags über!!).
Isch natürlech wäuts intressant gsi u hei viu glert - wo isch z'Drogeviertu, dr Prostitutions-Distrikt u natürlech wo aui Alkis umehange. Hie bechunntme veiechli derbi Droge ab 5$ - u di günschtigschti Nutte isch ou 5$ (s'isch 5$ dases grad für äbä di Droge längt). Wemä aber d'Luxuswariante wäut, zautme 20'000$ fürne Nacht.....dr nätt Herr Polizischt hetmi när agluegt u het gseit mim Gsichtsusdruck nache heigi grad gmerkt dasi äuä bis iz am fausche Ort heig gschaffet - hanim när ni gseit dasi ir Schwiz bir Gmeind u u. a. bir Polizei ha gschaffet ;-)).

Eigentlech heisi hie wäuts strängi Gsetzt - jeglechä Besitz vo Droge u v.a. o vo Marihuana isch strängstens verbotte u strafbar - d'Polizei hie kümmeretsech aber eigentlech gar ni drum. Äs passiert eim auso nüt wemä hie kiffend dür d'Strass louft u vor Polizei kontrolliert wird (Canada sig die Stadt mitm absolut gröschte Marihuana-Verbruch).
Äs erstunt mi iz ou nüm wsi hüt am Morge ha erläbt. Ha ufe Bus gwartet u när isch einä mitme Truck (auso eigentlech für di Lüt hie äs normaus Outo) vordranne gsi u het müessä warte ar Chrüzig u när heter eifach im Outo ä Joint groucht....

Ja, eigentlech hätme ja scho dörfe/chönnte Föteli mache. U ig bi ja mitlerwile dr Obertourist (weni dr Föteler mau ni deheim vergisse) u fötele aus, aber das wasi hüt ha gseh isch eifach z'Derb. Isch wük nüt schöns u drum hanis la si....

Wi im Fium...

Ds git nume ä churze Blog-Itrag, aber mues das grad schnäu schribe süsch hanis eh när ume vergässe bis nächschts mau.

Iz bini gmüetlech hie i mim Zimmerli ghocket u plötzlech hani Musig ghört u has ni chönne lokalisierä, när luegi usem Fänschter u när fahrt z'Glace-Mobiu düre....wi im Fium, mit Musig u so......isch ja wou so öppis vo abgfahre. Mues z'nächschte mau dr Föteler parat ha (bi no ni sone richtige Tourischt, z'Haubzit vergissi dr Föteler deheim - u iz ischer nöime z'ungerscht ir Täsche gsi).

Hie isch eh aus chli wi im Fium. Eismau bini am PC gsi u plötzlech hets huerä gchlepft bi üsm Huus...när hani usegluegt u när ischs dr Pöschteler gsi wo het d'Zitig häregschosse - zwar ni mitm Velo, aber är het di Zitig vou az Huus härebrätschet....

A propos Fium....vilich chömemer iz de imne Fium...d.h. üse Schueucar. Womer uf Whistler si heimer z'Vancouver zersch ni usdr Stadt chönne wüusi d'Strass hei gsperrt fürne Fium z'dräie. Si hei sone riise Laschti gha mit Kamera u auem Drum u dra druffe u vor u hinge dranne je 2 Polizeioutos....när heimer äbä müessä warte bissi dert hei fertig dräit gha u hei när "chönne" hingenachefahre für usdr Stadt use....

Auso, ds ischs eigentlech scho ume gsi. Leider keni Biudli....

Whistler

Hüt simer uf Whistler...ds isch dr Host Mountain Resort vo dä olympische Spiu 2010. Hami gfüeut wi deheim, s'gseht eigentlech genau glich us wi ir Schwiz... S'het no paar gha - auso eigentlech verhäutnismässig rächt viu - wo hei boardet, aber dr Schnee isch richtig schwär u nass gsi. Uf au Fäu simer natürlech mit dä Brasilianer zoberscht ufe Bärg i Schnee. Isch rächt luschtig gsi, di hei z'erschtä mau i ihrem Läbe Schnee gseh....heise när chli müessä coachä, di hei ke Ahnig gha wisi scho nume söue loufe. Mir si natürlech när d'Skipiste abeglüffe....ig mues zuegä no ig ha mini müeh gha - geschwige de d'Brasilianer. Uf au Fäu bini froh gsi um mini GoreTex Schue woni letscht Wuche ha gchouft (ja, ig hätt ou ni dänkt das di erschtä Schue woni hie choufe Wanderschue si...!!!), wüu mir si teilwis bis zude Chnöi im Schnee gstange u de si wenigschtens d'Füess troche blibe.

Sehr härzig isch ja gsi womer si ufe Sässäli....d'Schwizer hei natürlech vorab müessä. U womer dobe si gsi heimer uf di angerä gwartet u wosi si cho heisi ni chönne abstige - si hei dr Bügu ni ufta ;-))). Si hei aber sehr nätti Sässälilüt wone när hei ghuufe ;-). D'Lüt bi dä Bahne si eh wäuts nätt, dä bir Mittustation vor Gondle het id Gondle inegrüeft mir söuim d'Kamera usegä u när heter vonis äs Föteli gmacht...het zum Glück glängt bismer ume usdr Station use si ;-)

Si ämu när di ganzi Piste abeglüffe u au Schwizer hei rächts u links je ä Brasilianer gha wüu die eifach würklech ni si z'schlag cho ;-). Am Schluss simer när quer dr Waud z'dürab...wobi ig das iz nüm würd mache wüu s'het Bäre!!! Aui hei Bäre gseh, nume mir ni...u ig mues sägä zum Glück, wüu wemer hättä Bäre troffe wärs simli gnau vor üserä Nase gsi u ig hättmi äuä nüm wük wou gfüeut.

Whistler säuber isch äs wäuts härzigs Stedli. Gset us wi im Märli haut ;-). Ig hamer ämu vorgno de mau hie häre id Skiferiä z'ga - weni riich bi oder so ;-)). Aber eigentlech gsehts würklech us wi ir Schwiz...u d'Prise si ou seeeeehr ähnlech!

Ah, hani fasch vergässe. Ufem Härewäg simer mitm Car bire Raststeu zuchegha (seitmä äch zuchegha?! Sorry, ig weis mängisch chöme chli komischi Wörter, aber ig ha tatsächlech scho iz müeh dütschi Wörter z'finge. Mues mängisch u lang überlegä was äch dr dütsch Usdruck für öppis isch....mir redä hie würklech immer nume änglisch...). Uf au Fäu ischs äbä ni nume ä Raststeu gsi sondern d'Shannon-Falls....ha no nie sone risige Wasserfau gseh, aber isch idrücklech gsi.

Und - mir chunnt immer meh i Sinn - ig weis iz werum dases Lüt git wo hie häre biker-Feriä mache. Z'Whistler hets risegi Downhill-Streckine...u si hei Sässelilifte für ufe z'ga - si hei sogar spezielli Sässelilifte fürd Velos. Mir ischs ja sehr sympathisch wemä z'Velo cha ufne Lift gä für ufe z'fahre....ig fahre ou ni gärn ufe (ig weiss, bim Downhille fahrtme nie säuber ufe....aber het wük härzig usgseh). U unge ar Strecki hets sogar ä Velowäsch-Alag ;-)

3. Wuche

Auso, i derä Wuche isch eigentlech nüt speziells passiert....haut Schueu wi immer. Am Donnschti am Nami heimer eigentlech mitm Vancouver Police-Department ä Füehrig planet, aber si heinis leider uf di fauschi Tour buechet u drum isch nüt drus worde. S'wär ä Füehrig zu aune "dirty places" vo Vancouver gsi - so dert wome nie häre gieng we ke Polizischt drbi wär ;-)). När heimer haut müessä umbuechä uf nächscht Wuche. Aber äbä, anstatt Schueu simer när ine ice cream factory mit 218 verschidnige Glace-Sorte - u natürlech hetme aui chönne probierä bevorme öppis het gchouft...d.h. nach 10mau probierä hetme öppe ä Chugle Glace gha u nüt drfür zaut ;-). Für dasmer aber dert häre si cho heimer müessä dür China-Town loufe. U ig weis iz definitiv werum dasi ni gärn Fisch ha!!!!! Ig ha när ou bau müeh gha überhoupt no Glace chönne z'ässä....so öppis hani no nie gseh. Ä rise Fischmärit u d'Lüt hei di Fische eifach so richtig gchaflet....

Ds isch nume ä Bruchteil vor Gelateria-Thekä...(si hei dert sogar Tequila-Lemon Glace...)

Nachdr Glace simer zur Wendy (Lehrerä) hei. Di het äs Hus wo genau glich usgset wi d'Willa Kunterbunt vor Pipi Langstrumpf. Si isch haut ä Künschtlerä...u z'Hus isch wi erwartet "künschtlerisch" gsi....sones richtigs Hippi-Hus. S'git de mau nones Barbeque bire deheim u de chani de vilich chli meh Biudli mache.

Geschter simer när mitre angerä Lehrerä am Nami ine Pub - schlussändlech simer 6 Stung dert inne ghocket, aber isch super gsi....ämu d'Rächnig....240$...

Ds meini mit Fisch chafle....

Kanadischi Gwohnheitä

Ig bi ja iz scho zwe Wuche hie u füelemi ja ou würklech wou. Hami igläbt u s'chunntmer ni so vor aus wäres ersch zwe Wuche....ig merkes aber aube relativ schnäu wemer wider öppis ganz komischs uffaut. Geschter bini ine Safeway, das isch sone Lade wi z'Coop oder Migros. Eifach mitm grosse ungerschied, das d'Sache dert eifach so nach Luscht u Lune plaziert worde si. S'isch zwar überau agschribe wasme wo sött finge, aber s'het trotzdem kes System. Ig hami auso ufd Suechi nach Nutella gmacht.....bi när mau zum Schiud gange wos heisst "Breakfast" - nüt gsi, auso bini witer bisi ha äs Schiud mit Jam (Konfi) gfunge - ou dert ischs nüt gsi. Auso bini eifach düre ganz Lade u ha Gsteu für Gsteu abgsuecht - natürlech ischs när z'hingerscht gsi - bim Sirup!!!!!!!!! Da ig aber meh aus nume Nutella ha müessä ha bini schlussändlech 45 Minute i däm Lade umegirrt bisi aus ha gfunge...ig weis ni wi Lüt hie chön effizient ichoufe.

Ig ha natürlech gfunge ig loufe dert häre, de gseni no chli d'Nachbarschaft u so....s'si de irgendwie 6 oder 7 riiise Blocks gsi - d.h. öppe d'Distanz Niderwange-Bümpliz....aber isch ok gsi.

Ganz speziell si ou di kanadische Outo-Fahrstile. Wesi z'Gfüeu hei mitm Outo sig öppis ni guet de hautesi zmits uf dr Strass (u weni das sägä meinis ou so - zmits uf dr Strass) a, ohni Blinker u ohni nüt u loufe 3 Minute lang umz Outo ume u luegä öbsi ni öppis finge....
Geschter hetmi d'Lora (mis Host-Mami) mitgno ine Shopping-Mall....natürlech mitm Outo....di hei ä Voyager u si isch mit däm Outo gfahre wi öppe mitme Ferrari....65 ir 30er Zone u so, ig ha wük aube i de Böge angscht gha s'chertnis gli.
U natürlech schints hie erloubt z'si z'telefonierä zum fahre....hüt hani ämu eini gse imne so rise Truck (öppe ä doppletä Jeep) ir linke Hang hetsi z'eintä Natel gha zum telefonierä u ir rächte Hang hetsi z'angerä gha u het äs SMS gschickt....zum Glück si d'Strasse hie au grad - de muesmä ni stüüre, süsch hättsi nones Problem gha.

Töffe heisi iz ou füregno....u ig bi sicher am Sunnti isch irgendnöime äs verbottnigs Renne gsi - heis leider ni gfunge. Si haut so ar Houptstrass entlang glüffe (oder eifach are Strass entlang - Vancouver besteit ja praktisch nume us Houptstrasse) u när si 20 Töffe cho mit ungerbode Belüchtig, blaue Rückliechter usw. Hingenache si no 4 Trucks cho wo ufdr Ladeflächi Töffe hei gha woni no nie ha gse.....rächt abgfahre...

Ja, hüt leider kei Biudli.....ke Usflug gmacht sider.....

Cloverdale Rodeo

Hüt simer uf Cloverdale az Rodeo. Ig ha äuä no nie i mim Läbe so öppis abgfahrnigs gseh....jedi angeri Sportart isch ä Scheiss drgäge u ig ha ke Ahnig werum die ni ä wäuts höchi Todesrate hei!!!!

Aber isch kuul gsi....u si tüe dä Rössli ni weh ;-). Süsch wäri ni gange... Het ämu viu Cowboys gha ;-)). Isch eifach haut typisch Ami gsi - o wes z'Kanada isch, di dänke dert düre genau glich. Bevors het agfange hei au im Stadion müessä ufstah u när isch d'Nationauhymne cho usw.



U hüt heimer scho ume dr Steve Seagal gseh ;-). So chöimer auso 200%ig sicher si, dases nä scho am Friti isch gsi. Är isch irgendwie auso Special Guest am Rodeo gsi....

Shopping vs. Sightseeing

Hüt heimer eigentlech ä "gmüetleche" Tag wöue mache....aber ig bi äuä hie no nie so müed gsi wi ize. Agfange heimer mitm Harbour Centre. Ds isch sone Vancouver-Sightseein Punkt....eifach äs Hochhus wome ufecha u när über di ganzi Stadt luegä.

När simer witer id Robson-Street...ga shoppe. Isch chli wi Wiehnachte, Geburi u Osterä zämä gsi....eifach äs Paradies.

Nachm Shoppe simer ad English-Bay eifach chli ga si (hei natürlech kes Bikini drbi gha u si vor luter Wermi fasch usglüffe) u hei de när entschide dasmer no i IMAX wei gane Fium luegä - z'IMAX isch vo dert us zimli gnau uf dr angerä Sitä vor Stadt. Auso simer düre ganz Stanley Park glüffe u när vor Erschöpfig fasch tod umgheit....s'isch hüt 29 Grad gsi u i dä Wäuder hie ischs ni schön chüeu wi bi üs, sondern eher tropisch füecht. Nachdäm mer när usm Stanley Park use si heimer ä Salat-Beiz gsuecht...isch nid ganz eifach, aber hei ämu när eini gfunge u äs isch sooooooooooooooooo guet gsi mau öppis gsungs z'ässä hie. Ha wük äs Bedürftnis nach Gmües u Frücht u Salat.

Ja u de simer när i Chino sone 3D ungerwasser Fium ga luegä u vo dert us witer ines italienischs Restaurant. Isch wäuts guet gsi.... Dert heimer när entschide, nomau ufs Harbour Centre z'ga, für dasmer chöi dr Sunneungergang luegä....hei när dert obe 45 Minute ufe Sunneungergang gwartet u si wäuts froh gsi wos ändlech isch fischter worde....hei wük nüm möge.

U nachdämi när no ha aständegi Schue gchouft (ha natürlech nume Turnschue mitgno u ds isch für hie i dä Wäuder ni z'ideauschte) heimer ändlech hei chönne.

Suspension Bridge

Eigentlech bini ja wäuts müed u mah fasch nüm schribe, aber wenis hüt ni mache muesi morn u morn mani sicher de ou ni...

Geschter am Nami heimer frei gha - eigentlech wi jedä Friti - u de simer zur Capilano Suspension Bridge. Ha eigentlech gmeint s'sig haut sone normali Brügg....isch när ä Hängebrügg gsi mitme wäuts kuule Park im Waud.

Nachdr Schueu heimer mit paarne abgmacht wo o hei wöue mitcho. Mir hei gseit mir träffenis ar Waterfront z'Vancouver u de chöimer när zämä witer ga. Leider ischs ä rächt blödi Idee....wemä seit mir träffenis ar Waterfront isch das wi we mir sägä mir träffenis am 2i ir Autstadt z'Bärn (natürlech ohni witeri Agabe vore Strass oder so - eifach Bärn). Ja, nachdemmer när ä Stung hei gwartet, hetsech usegsteut das di angerä bir Bushautsteu vor Waterfront hei gwartet u mir bim Igang zum Sea-Bus - leider hei mir vo ihne ke Natelnr gha u ihne ischs ni vorhär i Sinn cho üs azlüte.... Mir heis de ämu när gschafft u si bi derä Brügg acho u si dert gmüetlch düre ganz Park gwanderet. U när simer dert no iz Beizli.....u plötzlech hocket eifach dr Steven Seagal (Alarmstufe Rot, The Patriot...) näbädranne am Tisch. Är het zwar Bodyguards gha, aber di hätt äuä no ig möge ;-). Si nume so Büeblis gsi.... Leider hani kes Foti chönne mache, isch chli pinlech gsi....het gnue angeri Lüt gha wo hei probiert Fötelis z'mache ohni das ärs gseht.... Uf au Fäu ischer wäuts aut u dick...isch ämu nüt schöns gsi. Aber houptsach ig ha iz mau öpper berüehmts gseh ;-)))

Bus-Fründ

Zum Glück chunnt gli z'Wuchenänd...ha nämlech kei Biudli meh für öich...auso, ig ha scho no viu, aber isch aus ähnlech wi ds woni scho ha ufeglade u dementsprechend für öich nid so intressant. U da mir äs längs Wuchenänd hei - am Mänti isch Victoria Day u denn heimer frei - wirdi sicher näbschtem vile lehrä (!!!!! ;-)) no Usflüg mache.

Ig gloub ig ha no ni so viu über z'hiesige Bussystem gschribe. Äs isch rächt schwärverständlech für Ussestehendi u ig gloub nimau d'Iwohner chöme rächt drus. Si hei so verschidnigi Zone u de muesch immer ä dementsprächendi Zonecharte ha. Am Sunnti chasch aber i aune Zone miter gliche Charte umefahre u chasch gratis öpper mitnä....ds isch das woni iz fang weis.

Ig hamer äbä iz ä Bus-Fründ zuegleit. Da hie ja überau jedä mit jedem redt - isch am Afang rächt gwöhnigsbedürftig, aber miter Zit vou kuul - hani im Bus mit eim afa redä wo hie ir nöchi wohnt. Ig weis eifach dasi nachem McDonalds mues lüte (d.h. äs het düre ganz Bös äs Seili u de muesmä dert dranne zie wemä use wott) dasi rächtzitig usechume. Leider si d'Busse meischtens so vou dasme nid usegset...bsungers ni wemä so chli isch wi ig u de wirdsch scho fasch problematisch. Da ig aber gmerkt ha das dä immer am gliche Ort istigt u use geit - u meischtens um di glichi Zit - hanine zu mim Busfründ bestimmt u de chani immer mit ihm ga. Ig weis ni wi das d'Iwohner mache - dassi wüsse wenn use ga, wüu d'Hautsteuä wärde ni agchündet, si hei ou ke Name - ämu di meischtä ni. Aber si hei Nummerä u zwar 5stelligi....

Ws ou ganz gwöhnigsbedürftig isch, isch dasme ar Böshautsteu ire Reihä wartet. Wär zersch dert isch cha zersch istige....isch ja logisch!!!!! Di si wük vou diszipliniert... S'macht aber ou Sinn, ämu am Morge. Meischtens hei nume no 3 oder 4 Lüt platz. D'Busse si so vou ds ni meh inemöge u de chöi haut die zersch istige wo zersch dert si. We aber dr Bus scho vou isch wener chunnt cho z'fahre de hauteter eifach ni a u geit witer. So ischs haut passiert das hüt am Morge 3 Busse düre si ohni z'haute uni när fasch bi z'spät cho wüu d'Busse fahre nume au 5 Minute u de hani 20 Minute müessä warte. Ds isch rächt müehsam, wüu si hei när kei Ersatzbusse. Muesch haut eifach ufe nächscht warte wos no Platz het.

Wed de mau im Bus inne bisch, muesch luegä dasddi richtig chasch häbe, wüu no wed 2oom vor dire Hautsteu lütisch - dr Buschauffeur brämset maximau 5m vorhär, d.h. jedesmau gits fasch ä Voubrämsig. U weme chli viu het gässe (wi mir eismau im Lighthouse-Park) u när ufe Bus geit, chas guet si dasmesech nach 5 Minute nüm wük wou füeut...

Mä gsehts leider ni so guet, aber ds isch dr Wasserflugzüg-Flughafe ;-))

Deheim

Eigentlech sötti ja lehrä....ha wäuts viu Ufgabe becho. Sit ig di däm Cambridge Kurs bi - auso eigentlech nume fang drü Täg - muesi nume no lehrä, auso d.h. ig sött...;-). Mues aus vo de letschtä 4 Wuche nachehole wo di angerä scho hei gmacht. Aber ig ma grad ni so wük u drum tueni öich doch chli ufm loufendä haute.

Ja äbä, dä CAE (wisi so schön sägä) Kurs isch wäuts sträng u vou deprimierend, wüu au angerä müessä nie Ufgabe mache wüusi scho aus chöi.... Dr Autersdurchschnitt isch iz wäsentlech töifer, u z'Niveau dementsprächend ou ;-).

D'Wendy, üsi Lehrerä, (u si isch wük ä typischi Wendy...so vou d'Hippiefrou ;-)) hetmer hüt gseit ig söu doch grad glichzitig no z'Proficiency mache. S'sig ni so schwirig weme eh scho am Advanced sigi....eigentlech hetsi ja scho rächt, aber ig muesmer das no überlegä. Si het gseit mini Chance stöngi guet dases längt.....aber de muesi no meh lehrä ;-((.

Da ig di Wuche ke Usflug ha gmacht bis ize hani haut mau paar Fötelis vo üsm Appartment gmacht. Ds isch eifach dä Teil wo für mi u mini Room-Maids isch. Äs isch rächt aut, aber u gmüetlech. U wemer wei chöimer jederzit natürlech ou im räscht vom Huus si - bir Family obe u dert isch aus nöi. Gseht chli us bi bir Bree vo Desperate Housewifes.....vilich chumi de mau no drzu dert paar Fötelis ga z'mache...

U usserdäm isch z'Wätter di Wuche ni wük guet gsi, geschter u hüt hets grägnet u isch wäuts chaut gsi. Drfür weisi morn u am Friti de grad 28 Grad....chunnt niemer drus...aber vilich gits de denn nöii Fötelis, wemer meh Usflüg chöi ga mache...

Auso, ds isch üses Hus vo usse. U ds Fänschter rächts näbdr Stäge isch mis Zimmer ;-))

Wime gseht hets i üsm Chüeuschrank eigentlech nume Miuch, Brot u Anke....meh bruchemer ou ni. Wüu z'Znacht bechömemer immer grad früsch ufe Tisch gsteut u am Morge chöimer säuber mache wimer wei.

Wssi hie aber eifach ni kennä isch guets Brot. Si hei hie eifach sone riiiiiiiiise Vorrat vo ihrem alibi-Brot u weme das toastet chames ässä.....s'isch ni wük fein, aber mä chas ässä ;-)

Nüt nöis

So, hüt schribi eigentlech nume öppis für das die wo jedä Tag gö ga luegä öppis z'läse hei ;-). Passiert isch ni viu sit geschter, mim Haus geits ou ni wük besser. Aber mini Host-Mum chocht grad Suppe - si isch äs super Ersatz-Mami ;-))!!! Ig ha leider kes Haustuech mitgno - ig ha eigentlech generell kei warmi Chleider mitgno wüui ha agnoh s'sig de wermer (si sägä aber au ou, normalerwis sigs viu wermer hie)!!! Aber ig ha iz mis Bikini-Pareo zume Haustuech umfunktioniert u s'isch super!!! Ig ga natürlech hie kes Haustuech für 30$ ga choufe (di biuige si au wüescht) wes scho gli wermer wird....

Hüt hani none kanadischi SIM-Card gchouft. Wedrmer auso öppis wichtigs müesst per Natel mitteile oder weit alüte de müesster das uf di fougendi Nr. mache: 001-778-288-9418

Ig ha nume eis Natel mitgno (süsch hätti nones Ladegrät meh brucht) u dert isch iz di kanadischi SIM dinne. Tue aber öppe au Wuche mau uf di schwizerischi Nr luegä. Wes auso ni sehr dringend isch chöiter natürlch ou uf di normali Nr. schribe.

Hüt hani ir Schueu dä Cambridge-Istuefigstest gha. Ussert mir wott niemer z'Advanced mache u drum chumi ine scho bestehendi Klass ine (di hei iz scho 8 Wuche mit denä Advanced Sache gschafft) u de wirds umso herter. Si hei gmeint it's going to be hard and you have to do lots of homework - d.h. 2 Stung pro Tag!!!!!!! Ig hoffe s'längt ou mit weniger, süsch muesi haut eifach würklech rächt Gas gä.

Ds isch Vancouver vo Burnaby (mim Homestay) us gseh...

U ds isch d'Brügg wo Vancouver mit North-Vancouver verbingt....u dert isch iz würklech IMMER stou druffe...

Ds isch äuä eifach äs Phänomen für sich...Koreaner müessä IMMER ihri Finger in Szenä setzä...;-)

Lighthouse-Park

Hüt simer i Lighthouse-Park. Äs isch eifach ä Park - nüt spektakulärs wi dr Europa Park, sondern eifach ä Park mit Böim (seeeehr viu Böim) u Bänkli u Blüemli usw. Mir hei dert rächt viu glert....s'het drmit agfange dsmer besser hätt uf d'Lehrer glost, di hei gseit mir söu dr Bus näh u mir hei haut gfunge mit näme dr See-Bus (Fähre) u drum heimer anstatt 45 Minute 2 Stund gha bismer si dert gsi....

Mir hei ou glert, dsme immer sött gueti Schue alegä - ni nume normali Turnschue oder Haubschue, ou wes "nume" ä Park isch. U schlussändlech simer au froh gsi heimer ä Usland-Chrankeversicherig (süsch wärmer äuä immer no am gliche Ort ufm Feus am warte - so heimer chönne ga u si beruhigt gsi, das öpper würd di tüüre Chrankehuschöschte übernäh ;-)). U natürlech simer au froh heimer d'Zeckeimpfig gha....s'het zwar niemer einä verwütscht, aber hätt guet chönne si.

U natürlech heimer no glert NeoCitran isch nid gleich NeoCitran....

Nach 2 Stung reis simer auso dert acho, u eigentlech besteit dä Park nume us Waud.....aber eifach ämne überdimensionale Waud, ni so wi mirs ir Schwiz kennä. Si när dert dä Wäge u Pfäd nache u plötzlech (auso eigentlech wüumer hei wöue uf dä Feus bim Meer) isch haut niene meh ä Wäg gsi. U mir hei när müessä chlätterä unis dür aui Büsch u so kämpfe....ig ha blöderwiis nume Turnschue angha - wüui ou gar nüt angers ha mitgno u einä wo isch mitcho het sini Usgangshaubschue angha - aber är hetsech guet gschlage mit denä. Ig muesmer de äuä irgendwie hie öppis ga choufe.

Ds isch dr "Wäg" womer si härcho...

U da heimer ufe müessä...

Nach langem loufe, luegä u chlätterä heimer am Schluss none Sprint häregleit füre Bus z'verwütsche - leider hets ni glängt u mir hei müessä ä Haubstung warte...

Ig ha när wöue ga öppis gäg mi Rühme choufe - s'isch rächt chaut hie u ig ha natürlech nume Summerchleider mitgno (di angerä hättä ja viu meh Platz brucht). Ha när imne Drug-Store nöime NeoCitran agschribe gseh u bi dert häreglüffe u s'het 8 oder 9 verschidnigi gha, ha när haut eifach eis gno...wird scho guet si - auso ja, zum trinke ischs rächt grusig, aber s'nützt hoffentlech.

Aquarium

Geschter simer iz Aquarium - dert chame di ganzi Ungerwasserwäut vo Vancouver ga luegä - u ig bi no ni sicher öbi hie je einisch wirde im Meer ga bade.....s'het rächt wüeschts Züg drunger gha. Si 14 Lüt gsi u näb dä 5 Schwizer si aus Koreaner gsi. Koreaner si wäuts luschtig, aber eifach sooooooooooo müehsam. Wahrschinlech hättemer ds ganze ir Heufti vor Zit gschafft we nume Schwizer wärä gsi....Koreaner chöi eifach ni loufe. We mir si langsam (u de meini wük langsam) glüffe hei die müessä springe....ig weis ni was für Schritte die mache.... U immer wesi öppis nöis gseh oder mä ihne öppis nöis verzeut machts "oooooohh"...

Nachm Aquarium simer no chli düre StanleyPark glüffe u ig gloub i ha no nie im Läbä so viu Eichhörnli gseh....u v.a. ni so zuetroulechi. Mä het eifach müessä d'Hang usstrecke u warte u när sisi cho...

Am Abe simer när ine Nightclub.....i einä vo vilne, di hei hie kilometerlängi Strasse u zwar vou mit Clubs u Discos u Pubs....

Dert wo mir si gsi het haubzit ä Band gspiut u di angeri Heufti het ä DJ ufgleit. S'het wük wäuts gfägt. Di Lüt wo si mitcho kenni nimau ä Wuche u mir heis u guet zämä gha. Einä wo üsne Lehrer isch no mitcho, u ou mit däm heis au guet gha.

U ä Grund meh hie z'blibe isch, Kanadier wüsse würklech wime fiiret.....s'isch ni so stier wi bi üs ir Schwiz...;-) z'aueri beschtä hie isch, äs isch äs generells Rouchverbot i sämtlechä Restaurants, Clubs, Pubs u aune angerä öffentlechä Geböide. U weme dusse nöime wott rouke, muesmä mindestens 6m vom nächschte Igang wäg stah - d.h. Downtown ischs praktisch unmüglech irgendnöime z'rouke!!!

Hei bini när mitm Taxi, isch wäuts günschtig....hei fürne haubstündigi Fahrt 17$ zaut. S'hätt irgendwie so öppis wi Moonliner, aber bi di einzigi gsi wo hätt mitm Bus müessä ga u drum hani mi ni uf das Wagnis igla (bis iz hani hie no niemer troffe womer het chönne sägä wi ds gnau isch mit denä Busse).

Bi irgendwie am 3 heicho u hüt am haubi 9i scho ume ufgstange wüu mini Host-Ching Geburifestli hei u aus i üsm Appartment hei vorbereitet - u si si ni grad lislig gsi. Si hei 20 Ching iglade - drum "muesi" de när äuä no chli id Stadt.....süsch weisi ni öbs guet chunnt ;-).