Shopping

Einisch meh hetsech hüt bestätigt dasi mau ä sehr sehr sehr riiche Maa bruche - chöit auso aui scho mau chli d'Ouge offe bhaute fürmi ;-).

Da's hüt bi üs zwar wäuts schön Wätter isch gsi, aber so fescht gluftet het dasme het müesse d'Sunnebrüue alegä dases eim ni aus wo ir Luft umeflügt id Ouge luftet, hanimi entschiede ga z'shoppe anstatt a Strand z'ga (ig weis, mis Läbe isch so asträngend hie....ig ha iz nume no am Morge schueu u am Nami muesimi immer entscheide öbi wott ga shoppe, a Strand oder ga umekäfele....ganz müehsam ;-)).

Dä "Sturm" isch aber no relativ derb gsi. Di ganze Strasse vo Vanvouver si grüen gsi, wüus sämtlechi Bletter vo de Böim het abegluftet - eigentlech gsehts us wi im Herbst, eifach das d'Bletter no grüen anstatt rot si...

Uf au Fäu bini ad Robson-Street - das Einkaufsmekka vo Vancouver!! U wüu ja hie aus chli angers isch für mi bini natürlech ni i H&M sondern Tommy Hilfiger, Guess usw. Ha de usegfunge dases viu meh fägt dert ga iz'choufe aus im H&M. Währenddäm mä am Chleider aluegä isch chöme d'Fröleins u frage öbsi fang dörfe ä Garderobe reservierä u de chame ne aus mitgäh wome scho het usegsuecht...u wemä de parat isch chame nume no id Garderobe ine ohni müessä az'stah!! U wemä das ganze när probiert het u s'natürlech passt ume geit ga zahle (wobi mä nones 5 Minutigs Gspräch mitm Kassier het vo wo dasme chunnt, wasme macht, öbs eim gfaut, wis eim geit, weli Schueu dasme bsuecht, usw.) packesi di ganze Chleider i Sidepapier i (finge ig ja persönlech fasch z'beschtä vo auem...;-)). Ig mues hie vilich no säge das Final Sale isch, d.h. äs isch wäsentlech sehr sehr sehr viu günschtiger auses süsch wär (würds ja angeräfaus ni vermöge....ha mi riich Ma no ni gfunge ;-)).


Hüt hani aber ou gmerkt dasimi hie scho fasch z'fescht deheim füehlä....ha nämlech scho fernweh becho (natürlech ni nach deheim)...ha Föteli vo angernä gseh wo iz bispiuswis grad z'West Palm Beach si fürnes haubs Jahr u das schint dert ou relativ nätt z'si...
Weni aber när dra dänke dasi nume no 5 Wuche hie bi muesi scho afa pressierä mit Plän z'mache wasi no aus mues gseh.....auso dir gseht bi chli imne Dilemma im Momänt. Aber s'chunnt de scho aus guet....u süsch chumi de eifach speter ume da häre ;-).