Grouse Mountain isch eifach sone Bärg z'North Vancouver. S'hätt ä Gondle für ufe, aber di chochtet 35$ - isch ja klar das jedä louft. Auso heimer das ou gmacht. Dr Wäg wär eigentlech nume 2.9 km, aber 853 Höhemeter. U s'geit so zimli gnau eifach grad dr Bärg z'deruf....d.h. ni öppe so wi dr Wäg ufe Gurte - guet vilich d'Downhillstrecki. Mir si auso meh oder weniger dert ufe gchlätteret i 90 Minute. Di schneuschtä hei 27 Minute, di hei dert aube so wi contests ufe. U mi Hostvatter hetmer vori grad gseit dassi d'Vancouver Canucks im Trainingslager dert ufeschicke - ig bi iz auso parat für d'Kanadier Hockey z'spile ;-).
Ha haut äs Biudli müesse abelade....das wär dr "Wäg"gsi womer hei müesse ufe"loufe".
Ig ha würklech mini Gränze erreicht...ig bi so kabutt gsi ig ha nimau chönne Föteli mache - nei erlech, ig bi i üsne Pouse nimau abghockt, wüui ha gwüsst dasi ume mues ufstah u das wär z'asträngend gsi, ig ha würklech aui mini räschtlechä Chreft müessä sammle. Ig weis, das tönt rächt kitschig u doof, aber isch wahr!!! U womer de ändlech si dobe acho hani meh oder weniger nüm gspürt.... Mis Shirt isch durch u durch nass gsi, het ke trochnige Fläck meh gha.
Aber ig gloub dr schlimmscht Momänt isch gsi wonimer z'erschtä mau ha überleit um z'cherä. Ig bi scho haub tod ufm Wäg gläge u ha när aber gfunge ig loufe iz glich witer, mir hei ja sicher scho über d'Heufti (eigentlech bini überzügt gsi dasmer sicher scho 3/4 hei) - när chunnt einä abe z'loufe u seit är heig d'1/4 Tafele erreicht u heigsech när entschide um z'cherä - vo dert us wo mir si gsi hetmä di Tafele nimau gseh..... Ig wär am liebschte abghocket u hätt afa gränne, aber wahrschinlech bini z'erschöpft gsi.
Das wär auso mi erhousam Sunnti gsi...
Ah ja, ha ä Bär gseh....aber nume so haub ir Wiudniss. Isch irgendwie sones Reservoir gsi wosi Bäre häretüe wosi grettet hei... Süsch wäri ni so nöch zuche - ig meinä wes ke Zun gha hätt.
Keine Kommentare:
Kommentar veröffentlichen