Ig weis, s'isch langsam nüm so spannend i mim Blog. Aber passiert haut im Momänt grad ni so viu nöis. Da ig im Momänt ke Zit ha für Usflüg - u de när ke Gäud me ;-) - wirds äuä nächschtens ni besserä - excüsée!!
Hüt simer zum Burnaby Lake. Hei sogar dra dänkt Tüechli u öppis z'Ässä mitznäh, wüumer ja de dert lenger si u gärn chli möchte härehocke. Ja usm gmüetlech härehocke isch nüt worde, s'het nämlech niene äs Plätzli ha zum hocke. Entweder isch Sumpfgebiet gsi oder Waudwäg.....auso simer dr ganz Nami desumeglüffe u hei de irgendeinisch nach langem Loufe äs Fäud gfunge wosi hei Cricket gspiut u dert heimer de chli chönne härehöckle....isch natürlech sehr gmüetlech gsi u genau wimernis das hei vorgsteut....
Am Abe heimer när eigentlech wöue chli i Usgang - hei geschter äxtra Schue gchouft wüusi dert womer häre hei wöue sone stränge Dress-Code hei. Leider simer z'früe gsi - komischerwis, wüu z'früe si chame hie fasch ni. Mir si haut am 8i dert gsi u si hei ersch am haubi 9i ufta. De simer no ine Pub u hei so uf di haubi 10i wöue zrügg....u womer si cho hets gheissä mä mues ä Stung astah bisme dinne isch....u das isch hie überau so, ni nume i däm eintä Club. Äs isch auso ni lächerlech gsi dasmer eigentlech hei wöue uf di 8i ga. Wüu aus was nach 9i isch, chame hie vergässe - ussert mä steit gärn a!!!
Uf au Fäu simer de när chli derä Club-Strass entlang glüffe u när hani zwöimau müessä luegä - hami auso ni girrt. Ha dert einä troffe woni vor 2 Mönet ar Geburiparty vore Kolegin ha gseh.....söu no einä sägä Vancouver sig ä grossi Stadt u d'Wäut sig riiisig. Isch rächt komisch gsi, loufsch haut so dür d'Strass u triffsch einä wo ir Schwiz fasch näbdr wohnt....u das aus zuefälligerwiis....
Si ämu de när nüm witer, sondern no hurti i McDonalds u när hei. U wüui iz so früe hie bi, hani haut no hurti mi Blog-Itrag gmacht...
2 Kommentare:
Hallo du Gueti, i wett nume sägä, dass ig dini Blog-Iträg gar nid öbbe längwilig finge! Im Gägäteil, i fröiä mi jedä Morge, weni ids Büro chume, schnäu di Blog adsluege u bi aube ganz gspannt, öb du öbbis Nöis drigschribe hesch. Für üs Läser isch das aues nöi u somit gar nid längwilig, oh wes dir vilich so vorchunnt :). Schrib doch bitte mau, was für Lüt du hesch lerä kennä bis jetzt, wie die so si, vo wo si chöme etc. Häb dr fescht Sorg und viu Erfoug bim lerä. Dicke Drücker, Gabi
lauper.lauraHoi Nadine,si i de Ferie gsi u ha no nid nache möge mit auem läse aber ig föiä mi scho druf. Du schrisch so guet mi chas sich guet vorsteuä.
Ganz liebi Grüess Laura
Kommentar veröffentlichen