Rägä

Dr letscht Tag vor Melbourne – und somit o z’letschte mau Campingplatz wächsle. Nichts ahnend simer ufgstange (wi geng, hei Zmörgelet usw.). Si iz Outo ghockets und……………………………………………………………………………………………………..nüt isch passiert. Nach paar komisch ustuschte Blicke none Versuech………………………………………………………………………..immer no nüt passiert. Mir hei wedr dr Radio no z’Liecht oder süsch öppis la loufe u dä sch….. Chare isch eifach nid gange. Auso heimer mau dr Campingwart gfragt öbernis cha häufe, dä isch de mit sire Mühli cho u hets probiert, aber isch geng no nüt passiert (dr Chrigu wett no gseit ha daser vo Afang a het gseit gha das di Kabu z’dünn sige!!!). När heimer no di nätte Schwizer näbädranne mitm gliche Camper gfragt öbmers mit ihrem o no chöi versueche (natürlech mitm Campingwart sine Überbrückigskabu – hei natürlech keni mit übercho), aber das het ou nüt bracht.
Auso heimer äs witers mau mit de Apollo Kontakt ufgno une das Problem gschiuderet. Nach knapp ere Stung isch dr australisch TCS cho u nachdr zwöite Batterie woner het aghänkt gha hets de o klappet zum überbrücke. Mit der Empfählig, z’Outo bis uf Melbourne nüm abz’steue simer de los.

Hei ungerwägs no müesse ga ichoufe. S’het leider ke Woolworths gha womer immer gö ga ichoufe u nach churzem umeluege heimer aber de ä ALDI gseh. Hei üses Glück dert probiert u müesse auso sägä, das isch ni z’dümmschte gsi womer i dene Ferie hei gmacht. Z’Brot womer dert hei gchouft isch z’beschte gsi womer bis ize hei gha u uf aus ufe ischs o wäsentlech günschtiger gsi aus süsch aube.

Hei de gott sei dank z’Outo wider chönne vo säuber ala u si witer no iz Royal Australian Air Force Museum. Hetsech aus ganz intressant erwise u das dusse i Ströme rägnet heimer üsi Zit auso guet chönne so vertribe.

Vilech muesme no sägä wemer scho bim strömende Rägä si, dases hie zwüschedüre rägnet wi ir Schwiz, auso rächt heftig. Aber im Gägäsatz zur Schwiz kenne si hie ke Strasseentwässerig – o ke Trottoirentwässerig. D. h. mir wüsse iz werum dass si überau „floodway“ aschribe. U mir wundere üs werum das hie ni meh Lüt mit ganz höche Gummistifu umeloufe. Äs het eifach mängisch so rise Glüngge, oder bessergseit Wasserlöcher, das weme dürefahrt me fasch nüm gseht wüus so sprützt u die ringsume hei de ume mau d’Fassade abegwäsche.


Dr Tag nachdäm dr Camper isch kabutt gsi – dasmau isch dr Camper nass gsi u zwar vo inne!!! Äs het grägnet, wi scho ufdr Great Ocean Road u äs het eifach ni wöue ufhöre. Di ganzi Nacht hets grägnet u womer am morge si ufgwacht hets immer no grägnet. U z’mau heimer gseh das aus nass isch im Camper inne – u zwar ni wi süsch eifach nume kondänzwasser…hei de afa sueche u hei z’Leck, resp. di 2 Lecks, de o gfunge – dert wo z’Ufsteudach mitm Camper verbunde sött si.
Heinis de ni la beirre u no einisch chli witergschlafe (Nadine ;-)). Nächer heimer usgibig zmörgelet – wos immer no het grägnet – u drzue Campingplatz-TV gluegt(d. h. mä luegt dä Mit-Campende zue wis ihne so geit (natürlech vom Schärme us) – z. B. z‘4. imne Van wovo zwöi ir usboute Dachbox hei gschlafe u zwöi unge zwüsche Stüeu u Bänk. Si hei de afa Platz mache u fang ihres Gepäck vore Van gsteut – äs het übrigens immer no grägnet – u vode Bire id Schnitz gluegt)…

Si de när mitm Bus uf Melbourne iz Zentrum ine u hei dert d’Sehenswürdigkeite agluegt – mitlerwile hets nüm grägnet, oder emu nüm fescht.
Eigentlech isch scho z’Busfahre äs Erläbnis gsi. Womer häre si heter plötzlech aghaute unis ine angere Bus gschickt, wüu sine agäblech kabutt sigi. U womer de si heicho simer plötzlech vor Route abcho u imne rise Bus-Parkplatz gstange. Nach churzem wärweise heimer de gseh dassi dert hei Chauffeurwächsu gmacht – zmits währendem Fahrplan…..si äuä eifach d’Oustralier.

S'het dasmau haut leider keni Föteli gäh, aber di wärä i däm vile Rägä sowiso ni wük guet cho...

Great Ocean Road

Hie heimer no ä chlini Ergänzig zum letschte Itrag vo Kangaroo Island. Am Sunnti bevormer uf di tüüri Fähre si für zrügg ufz Festland simer no ad Seal Bay. Hei dert ä Guided Tour gmacht - di isch meh oder weniger drus bestande das eini het gseit i chume iz mitnech a Strand u dert dörfter ni nächer ad Seehüng häre aus ig u wedr Frage heit steuet die...... Aber äs isch glich super gsi. Hei di Seehüng vo ganz nöch gseh u chönne fötele....:

Ume ufem Festland heimer wöue z'Victor Harbor übernachte für när witer i Grampians NP. Das hetsech de aus schwiriger usegsteut aus dänkt - South Australia het Schueujahrändi gha u de gö aube au Schoolies (wisine sägä) uf Victor Harbour ga zäutle. Es si auso aui Zäutplätz räschtlos usbuechet gsi. Si de öppe einähaub Stung umegfahre bismer ändlech hei ä Campingplatz gfunge womer no hei platz gha.

Si de witer i Grampians National Park. Hei de langsam festgsteut dases nüm so eifach isch üsi Asprüch z'befridige - mir hei scho so viu gseh u so viu Idrück gwunne, dasmer irgendwie äuä wählerisch wärde u nüm so eifach z'fasziniere si. Äs isch schön gsi...

Voller Fröid heimeris när ufe Wäg ad Great Ocean Road gmacht - aber wi chönnts o angers si we mir zwöi eis vode wahrzeiche vo Australie gö ga luege - äs het gschiffet!!!!!!!!!!!!!!!!!!!!!!!!!!!!!!!!

Si de glich de Apostle usw. nache u hei z'beschte us däm Wätter gmacht...

Womer de no si ga tanke het dr Tankwart dr Chrigu grad wöue asteue....är het sini Häng agluegt u gfragt waser schaffet. U woner het ghört daser Mech isch ischer fasch im vieregg gumpet. Är het de grad ufzeut waser no aus z'flicke hätt u het gfragt was Chrigu fürne Überchleidergrössi het ;-)). Am Schluss heter de gfunge mir sigi ja no jung u chöni grad da häre cho wohne u si Lade übernäh....heinis de nach richleche Überlegige drgäge entschide ;-)))...

Kangaroo Island

Kangaroo Island









So, mir hei lang nüm gschribe, drfür heimer dasmau ume chli meh z’verzeue, resp. viu Biudli z’zeige. Z’Adelaide heimer ni so viu gmacht. Heis vor auem gnosse ume mau chli zrügg ir Zivilisation z’si. Si id Stadt chli ga lädele u no i Zoo. Het chli öppis gchoschtet, aber äs isch ä wunderschöne Zoo u mir hei ganz viu gseh.

Vo Adelaide us simer witer via tüürschti See-km uf Kangaroo Island (vom Festland sis 16km u mir hei 348 AUD zaut für üse Camper u üs zwöi!!!!!!!!!!). Aber äs hetsech natürlech glohnt.
Womer si acho simer am Abe uf Kingscote iz Penguin Centre. Hei dert ä Füehrig übercho u Pinguine chönne ga luege wisi eifach so läbe. Het leider ni gueti Fötelis gäh, wüume ni mit Blitz het chönne fötele – u da ds Ganze ir Fischteri isch gsi hetme o dementsprächend weni gseh…
Am erschte ganze Tag womer hei gha hie simer d’Kelly Hill Caves ga luege, isch so chli ähnlech wi d’Beatushöline. Het Stalagmite u Stalaktite u Heliomite (di wachse horizontau oder eifach chrüz u quer). Hei dert ä Füehrig gha u das isch sehr interessant gsi. Dr Guide het aube Spässli gmacht u für sini Usfüehrige dr Sponge Bob u Ice Age brucht.

Vo dert us simer witer ufe Camping Platz wos ä Koala-Walk het. Hei zwar ufm ganze Walk nume ei Koala gseh, drfür hetersech rächt guet i Szene gsetzt:

Am nächschte Tag simer i Flinders Chase National Park. Hie hätts gaaaanz viu Sache z’gseh gäh, aber het natürlech ni für aus glängt u drum simer zum Admirals Arch (dert läbt ä Kolonie vo 7000 New Zealand Fur Seals) u zude Remarkable Rocks. Isch aues sehr idrücklech gsi u besser z’erkläre mit Biudli aus mit Text.

Womer ume zrügg zum Camping si heimer de no dr richtig offizieu Koala Walk gfunge u dert hets de o meh Koalas gha. Di meischte hei aber gschlafe. Drfür hets no ganz viu Känguruhs gha wome ganz nöch het zuche chönne.

Outback

Auso, mir si de los zum Kings Canyon. Da mir es 4X4 Fahrzüg hei gmietet natürlech überne so genannti unsealed Road – eifach ä unteereti Strass, wimesech die z’Oustralie so vorsteut. Am Afang isch das ja no luschtig gsi, aber di letschte 40 vo 200km ischs eifach nume no zum göisse gsi……












Es het eifach ghudlet u tschäderet u womer si acho heimer bau aus müesse nöi iruume hinger im Camper u mit putze heimer ou ume vo vore chönne afa, da d’Camperbouer s’nid für nötig hei gha rings um d’Leitige abzdichte das dr Sand nid inechunnt. Mir hei ni nume ir Kabine rote Sand gha, sondern ou i dä Schäft, ufem Gschirr, uf de Läbesmittu usw. Dr einzig Ort wo isch verschont blibe isch gloub dr Chüeuschrank gsi. Houptsach es het gfägt ;-). Usserdäm heimer uf dä Wäg Tierli troffe womer süsch ni hätte gseh……hei ä Herde wiudi Kameu gseh, resp. fasch überfahre u när hets ganz viu wiudi Rössli-Herdene gha.












Im Kings Canyon acho, simer aus erschts ufe Campingplatz. Da d'Wättervorhärsag 41 Grad isch gsi, heimer de nume ei Nacht buechet u hei de hüt o nume di stündegi u ni di längi 4stung Wanderig gmacht. Es isch auso sage und schreibe am Morge am 8i über 30 Grad gsi.
41 Grad chöiternech öppe so vorsteue: mä schwitzt immer no, aber me merkts nid wüu dr Schweiss verdunstet bevorer überhoupt sichtbar wird. Oder weme d’Häng wäscht u kes Tüechli het zum abtröchne geits öppe 30 Sekunde u när sisi troche (ohni dasmese het am Shirt abtröchnet).









Si de nachdr Wanderig witer richtig Uluru. Hie acho, heimer wider sofort dr Camping buechet u wägdr unerträgleche Hitz beschlosse, mau chli am Pool z’verwiile. Si hei morn wider über 40 Grad im Schatte gmäudet u ufe Uluru chame ni ufe (d’Schmärzensgränze ligt schinbar bi 36 Grad u dert simer ize dütlech drüber). Mir gö auso de eifach mau ga luege wasme dert so cha mache. Uf jede Fau gömer de o no zude Olgas.

Nachdäm mir mitlerwile sowou d’Krokodiu, d’Schlange, Chrött u Riseheuschrecke hei hingernis gla (d’Flöige si immer no stetegi Begleiter) heimer iz no d’Ameisi atroffe. Di si aber o ersch ad Oberflächi cho wos het abegchuelet (uf 30 Grad). Das isch aber so schlimm, dasme nüm cha dusse hocke (ussert mä het d’Bei ufe). Weme 5 Sekunde blibt am Ort stah, hetme mindestens 20 Ameisi a jedem Bei. Mir heis auso mit chochigem Wasser u Anti Brumm probiert, aber es het aues nüt gnüzt. Drum hocke mir ize im klimatisierte Camper inne u tüe Blog schribe.

Tag 2 bim Uluru; mir hei einisch meh gmerkt – verschiebe nie auf morgen, was du heute kannst besorgen ;-). Simer doch hüt am Morge ufgstange u es het i ströme grägnet!!!! Hei dänkt das vergeit de u hei langsam zmörgelet unis parat gmacht, aber leider ischs nume no fasch meh cho. Si de glich los richtig Uluru u Olgas. Für paar churzi „Wanderige“ hets glängt, aber es isch auso nüt schöns gsi. Hei de dänkt mir gö zrügg u frage im visitor centre was morn für Wätter wird – genau glichi Gwitter wi hüt u 80% Räge……. Si de i Camper u plötzlech hets gägä di haubi 5i afa schön wärde. Mir hei de blitzartig gchochet u när abgwäsche u si ume losdüset richtig Uluru. Heine de tatsächlech im wunderschöne Abesunnerot verwütscht u d’Stimmig probiert z’gniesse – mit öppe 80 angere Lüt undeme Heli im Himu ;-). Isch würklech äs wunderschöns Schouspiu däm zuez’luege winer sini Farb vo Sekunde zu Sekunde änderet, bis d’Sunne furt isch u no chli lenger.









Morn gömer definitiv richtig Süde, d. h. scho fasch Adelaide, witer.

Hüt nume ganz churz……
Ussert 750Km gradi Strass isch nid viu ds erläbe gsie. Si itze ds Coober Pedy u luege mau öber no sone Opal Mine chöi ga luege.

Di längi Fahrt i Süde

Hüt simer no einisch i bös Schlange-Nationaupark zrügg. Dasmau aber nid ga loufe, sondern ufne Boot-Tour. Si so dür Schluchte (ok, bi üs wärs eifach normali Flüss wo chli „töifergleit“ si) u när no bimne Wasserfau ga bade. Isch schön gsi, aber ni extraordinär…










U wüumer äbä süsch ussert wäsche ni so viu erläbt hei, tüemer iz eifach z’hiesige Läbe no chli dokumentiere.

Es isch ungloublech wi tüür das hie Bier isch – für es 6er-Gascho Büchse zautme hie 16$ u fürnes 30er Pack 40$ (aber das isch de abegschribe gsi). O Wasser isch extrem tüür, aber das hani scho vo letscht mau gwüsst. Augemein o angeri Läbesmittu si türer aus bi üs – v. a. Frücht, Gmües, Milchprodukt, usw. Fleisch isch drfür ehner günschtiger (emu Rinds).

Süsch simer eifach so chli vornis am häreschwitze. Hie z’Katherine isch um di 40 Grad am Schatte, d. h. me ma chum vom Camper zum Pool loufe ohni zwüschinne fasch e Hitzestou z’ha. Morn fahremer richtig Alice Springs. Aber das si no guet 1200km, drum legemer de äuä no ä Zwüschestop i.

Widr obe gseht, chöimer ni vo sövu Action brichte wi die zwe Täg vorhär, aber das mues ja o nid grad immer si…
Mir hei du dä Zwüschestopp ds Tennant Creek igleid, nach däm mir ä ganze Tag lang immer u immer wider eifach immer nume si gradus gfahre u zwüsch ine mau no äs Steppefüür une toti Chueherde hei gseh…..










…… nach däm mir das am zwöite Tag widerhout hei simer du ändlech ds Alice Springs acho u hei wies nid angers chönnt si üse Camper müesse ga la flicke!! Der Chrigu hät das zwar äuä gschider säuber gmacht wüu die Aussies hei auso sage und schreibe 1.5 Stung gha fürne Batterie ds wächsle u no drümau ä nöi Batterie gha hole wüusi die fauschi hei gno!! Das spricht nid grad für das Land u sini Bevöukerig!!










Devils Marbles - e Sehenswürdigkeit ufm länge grade Wäg...

Morn blibemer no ä Tag ds Alice Springs u de gömer de zum Kings Canyon, Ayers Rock und Olgas… de simer de vilech nümm grad immer erreichbar wüumer de das ganze uf Outback Strasse wei erreiche so dasmer de dä Auradcamper o mau chöi teschte!!;-))










So gsehts ir Dämmerig us - ke Fotomontage....

Der, der mit der Schlange tanzt

Di letschte zwe Täg, auso geschter u hüt, si so speziell gsi, das si e eigete Itrag verdiene ;-). Vilech no aus Randbemerkig, mir hei ni jede Tag Internet u drum tüemer haut eifach aube aus i ei Post ine bismer ume zum nächschte chöme.

Auso, mir si vom Litchfield National Park hie uf Kathrine cho. Hie hets dr Gorge National Park, dert hets so wi Schluchte wome mitm Boot cha dürefahre. Wüumer aber chli spät si cho, heimer geschter nüm uf di Bootstour chönne u si haut süsch im Park umeglüffe. U de hets dert ä Lookout gha wome het chönne ufeloufe – oder besser gseit het chönne ufe chlättere. De simer dert ufe u fasch krepiert wüus so heiss isch gsi (mä gsehts ufm erste Biudli).












Im Nachhinein heimer erfahre das zwüsche 35 u 40 Grad isch gsi dert.















Es isch auso wime gseht ungloublech heiss gsi...

U när simer ume abeglüffe. Me gseht ja ufm Föteli wi steinig s’isch u drum heimer eigentlech o mit Schlange u so Viecherzüg grächnet. Si auso dert ume abeglüffe u plötzlech gumpet dr Chrigu uf u woni abeluege gsehni ä Schlange drvoschlängle – ja, si hetne bisse!!! Zum se Fötele hets leider ni glängt, si isch z’schnäu gsi….
Ha de mis Shirt (wo eh im Hosesack isch gsi) häregäh zum Bei abbinde. Mir hei ja denn no z’Gfüeu gha äs sigi ni so schlimm….si aber sofort zrügg zum Visitor Centre (400m bi 35 Grad – ig gloub mir hei ä Rekordzit härebracht u heiss gha heimer überhoupt nüm). Dert simer de emu o acho u hei verzeut was isch passiert, när si di Froue gseklet, Chrigu het müesse a Bode lige u sech nüm dörfe bewege – nimau rede. Si hei de afa sis Bei abbinde u hei ar Ambulanz aglüte.
Nach öppe 20 Minute isch di Ambulanz de o grad cho u het sämtlichi Grätschaft wosi im Outo hei gha grad brucht – Surstoffmaske, Infusion gsetzt, EKG aghänkt, es Ladli um z’Bei bunge dases grad blibt usw. Si de när iz Spitau u hie isch ume vo vore losgange – aui Frage no einisch beantworte, Schlange beschribe usw. Dert heisi när afa Bluet näh – insgesamt heisi emu 4mau Bluet gno (je 5 Röhrli) u hei de das la ungersueche. Me mues vilech no sägä, am Chrigu isches sowit eigentlech guet gange.
Irgendeinisch heisinis de vom Notfau ines Zimmer bracht u dert heisinis de gseit ig dörfi ni hie im Spitau blibe über Nacht. Auso hani müesse mitme Bus ga üse Camper hole wo no immer im Nationau Park isch gsi (öppe ä Haubstung wäg vom Spitau). Sogar d’Buschauffeuse het gfragt wis am Chrigu geit woni bi zu NP hingere gfahre…. Hani de o gmacht u ä Platz näbm Spitau-Pool becho, dasi no chönnt ga dusche u so.














Mittlerwile simer äuä in ganz Kathrine bekannt. I däm Nationau Park isch no nie öpper vore Schlange bisse worde u augemein heisi sehr säute Schlangebisse hie. Chrigu mues aune Schwöschtere immer d’Bisswunde zeige u schiudere wi das e so isch gange. Är isch „the one with the snake bite“ u ig bi si girlfriend oder „the girlfriend from the man with the snake bite“. Si heimi sogar hüt am Morge kennt woni bi vom Parkplatz zum Spitau glüffe u hei grad gfragt öbi zum Chrigu wott (u si de serigi gsi woni geschter no nie ha gseh…)
Schlussändlech müessemer auso 24 Stung im Spitau blibe u we aui Wärte de guet si, chöimer när ume witer.
Fazit vom geschtrige Tag: „Erschti frei läbigi Schlange gseh….
……aber ersch wosi bisse het!“ und „Mir hei Australien all Inclusive buechet“ ;-)











So wis usgseht isch Chrigu besser im Krokodiu fah, aus im Schlange bändige. Was fürne Schlange dases gnau isch gsi chame ni 100%ig sägä, aber d’Rangers hei gmeint s’sigi ä King Brown.














Das wär de so eini (ni vo üs gfötelet, ha no probiert aber si isch z'schnäu gsi...)

Camper

Hüt heimer üse Camper ghout – oder besser gseit üses Dräcksloch……ig hamer hüt gschwore nie meh Apollo-Fahrzüg z‘miete. Scho womer letschts mau z’Cairns hei z’Outo ghout isches aus dräckig gsi.

Si de när emu losgfahre richtig Litchfield National Park – u es het gschiffet u gschiffet u gschiffet. Hei au di Sehenswürdigkeite agluegt (natürlech im Rägä). När simer witer u hei fang so erschti Nahrigsmittu gchouft. U de heimer dert im Lädeli ä Bärner troffe – auso dr Ladebsitzer isch Bärner. Är het üs de gseit aui Campingplätz hie sige guet (är het äuä ni so höchi Asprüch). Si uf au Fäu im gröschte Loch glandet wos hie äuä git.

U da’s immer no het grägnet heimer afa Camper putze…..hei auso 3 Stung lang putzt….u gross ischer de nid!!!! Es isch eifach überau aus vou rote Sand gsi…logisch hets vo däm immer chli, da bringsch iz nie aus use. Aber di hei dä äuä no nie putzt, mir hei mängisch müesse ga früschs Wasser hole zum ufnäh.
Es isch aber nid nume dräckig gsi, nei üse Camper het o si ganz eiget Gschmak u zwar ni e guete. Es stinkt wine S** da inne.

Nach langem putze heimer de Hunger gha u wöue choche. Da’s immer no het grägnet dusse heimer dinne wöue choche (hei ja je zwe Platte). Leider het üs niemer gseit das nume die dusse mit Gas funktioniere, die dinne muesme mit Sprit betribe – u nei, Sprit heimer kene gha. Auso isch Chrigu mitm Rägäschirm use ga choche.

När simer ga abwäsche – zum zwöite Mau, hei nämlech am Nami scho z’komplette Gschir mit aune Pfanne o scho mau abgwäsche wüus so grusig isch gsi.
U womer de hätte Zit gha zum dusche isches dusse so fiischter gsi (u d’Duschine ungloublech grusig, no viu grüsiger aus bi Tagesliecht) dasmers grad hei la si.
Üses Fazit vom Tag isch auso quasi dases nume no cha besser wärde – u zwar so guet wi aus (Wätter, Campingplätz, Camper…) !!!

E Termite-Hügu

Tag 2 mitm Camper; hüt isch scho viu besser gsi (ok, nachere fasch schlaflose Nacht – mit viu Kängurubegägnige ufm Crappy-Campingplatz). Hei super Wätter gha u si nomau zu de Florence Falls, dert simer scho geschter gsi, aber hei wägm Räge nid chönne bade. Das heimer de hüt gnüsslech nacheghout. Isch wunderschön u erfrüschend gsi.

Flying foxes

Hei üsi Plän aber wägm Rägäwätter när gänderet u hei iz haut ufe Kakadu National Park verzichtet – dert si lut Parkrangers sowiso scho viu Strasse gsperrt u wes de glich ume Rägnet isches sowiso nüt schöns.
Ize simer z’Kathrine u blibe hie sicher mau zwe Nächt, hei ä schöne Campingplatz verwütscht – leider hets aber o hie Chrött sobau s’dunku wird – u hönnisch viu Krabbutierli (ha auso müesse id Männerduschi ga dusche wüui mi ni ha getrout älei id Froueduschi z’ga – si di einzige hie ufm Campingplatz).

Florence Falls

Wangi-Falls

Dr erst Road-Train womer hei gseh...

Darwin

So, mir si ändlech acho z’Darwin. Dr Flug isch absolut ni agnähm gsi. Hei zwar keni Turbulänze gha, aber eifach di tümmschte Plätz u di eutischte Flügere. Hei Frankfurt-Singapur e Fänschter u Mittuplatz gha. D. h. me steit innerhaub vo 12 Stung öppe einisch – vilech 2mau uf.

Hei leider üsi Flüg o ni chönne dürechecke…hei auso z’Frankfurt u z’Singapur no müesse ga Boarding-Päss hole. Z’Gepäck heisi aber de komischerwis grad chönne bis uf Darwin sende…. Z’Singapur heimer de tatsächlech eine haub Stung müesse astah für di Boarding-Päss – u äs het de ni hunderti vo Lüt vordranne gha, nei….öppe 10 Päärli. U womer si dra cho heisi auso e Viertustung gha bis si das Züg hei usebrösmelet.
U de simer när i dä letscht Flüger für uf Darwin – u äs isch schlechter gsi aus EasyJet!!!!!!! Sone auti Büchse hani äuä vorhär no gar nie gseh gha.

Aber o das heimer überstange. Ändlech simer de acho u üses Gepäck isch mau nid z’letschte gsi ufm Förderband. Ig ha natürlech no aus mis Ässä müesse furtschiesse – ha ja ni no äxtra lang wöue warte am Zou wüusi de aus erläse……..ja ja, di Illusion isch de gli verbi gsi. Nachdäm mir üsi 700 Gepäckstück hei i Röntgeoutomat inegla heimer gli gmerkt dassi üses Züg bsunders lang agluegt hei. U wi geahnt heisi üsi Täschene voukomme erläse u irgendöppis gsuecht wosi ni hei gfunge. D. h. mir wüsse wassi hei gsuecht….i mire Täsche usse inne wahschinlech z’Sackmässer (fingesi logischerwis ni wesi nume inne luege) u bim Chrigu heisi äuä ni gwüsst was di 5 Päckli Schüsslersauz-Tablette u 3 Dose Pulver si gsi……
Nach langem heimer emu de glich no chönne ga u heinis mau 2 Fläsche Wasser gönnt – für 10$ (!!!!).

Druf abe simer när usm Flughafe use u hei enttüschend gmerkt dases rägnet. Z’Taxi hetnis de zum Hotel bracht u hie heimer am morge am 6i (anstatt am Nami am 2i) fürne schlappe Ufpris vo 75$ scho chönne icheckä – di 75$ si eim glich weme 30h isch ungerwägs gsi u nume no wott ga dusche u chli ga lige.

Iz simer äbä hie u probiere d’Zit umezbringe, dasmer de am Abe ersch schlafe u ni ize scho. Use chame leider nume schlächt wüu äs rägnet, nei wahrschinlech isches äuä dr Monsun wo grad het agfange – oder eine steit ufm Dach u läär Fägchessle vou Wasser obe abe……auso äs schiffet eifach was abe mah.

Z’Thema Haarföne hetsech für di nächschte zwe Mönet hetsech emu o scho erlediget…ha scho dr erscht Steckdoseadapter kabutt gmacht mitm Fön, d. h. es het d’Sicherig vom Stecker grad gno (gott sei dank hani no e Ersatzsicherig drbi gha – auso, hetmer dr Pa no eini a Adapter gchläbt ;-)).

Das mau aus erschte Zwüschebricht….

Ize einehaub Täg speter chöimer sägä dases hie z’Darwin ungloublech heiss u tropisch isch. Mir hei z’Hotelzimmer uf „nume“ 26 Grad abeklimatisiert u wemer use gö trifftis fasch dr Schlag.
Vo Darwin säuber simer fasch e chli enttüscht. S’isch e so chli wine verlassnigi Stadt u es louft überhoupt nid viu. Vilech ligts aber eifach o dran, das iz äbä de Summer wird u s’eifach z’heiss isch zum öppis mache. Geschter heimer drum äbä eigentlech ussert paar Läbesmittu igchouft u chli umespaziert ni viu gmacht.

Hüt simer scho chli witer cho, d.h. mir si ufd Post u när wüus so heiss isch gsi ume zrügg a Hotelpool – wo d’Nadine de ä Churzschlaf (Hitz u Jetlag u süsch eifach müed wi immer) het igleit. När simer no id Crocodile Cove. Isch so wines Aquarium aber nume mit Reptilie. Dert heimer de zuegluegt wisi hei Crocs gfüeteret u hei säuber chönne „Crocodile Fishing“.
Hei de sogar no dr Darsteller vom originale Crocodile Dundee gseh ;-).

Morn gömer ga dr Camper hole u hoffe mir gsehngi de ab denn e chli meh aus hie z’Darwin. Di erschte Böse Moskitos si emu o scho verbi cho…;-(.