Nadine & Chrigu im Wiehnachts-Krabi

Wime gseht kenne ou d'Thailänder Rudolph the red nose reindeer...;-)

Bis iz heimer üs ja nid chönne vorsteue das gli Wiehnacht isch. Eigentlech isches immer no schwirig für üs, aber d'Thais gäbesech auso sehr müeh damit me chli i Wiehnachtsstimmig chunnt ;-)

Mir sis hie z'Railay würklech am gniesse. Mir gniesses eifach mau nüt z'mache, nid müesse jede Tag nöi packe, ni immer umereise u mau eifach chli nöime chönne si (ja ja, mir wüsse....dir sit aui am schaffe u mir söu nid jammere). Mir jammere ja überhoupt nid, aber äs git äbä ä Ungerschied zwüsche reise u Ferie mache. Ni das z'einte schlechter isch aus z'angere, aber es brucht eim haut ou ufne Art...

Mir lös üs hie la guet ga u lönis la verwöhne - mit guetem u kunstvou zuebereitetem Ässe, bädele am Strand u Thai-Massage.


Hie gömer aube ga bädele...

Das isch z'kunstvou zuebereitete Ässe...


U das isch z'Food-Böötli wo aube am Strand isch (dr Strand isch so wi abgläge vo Restaurants u när chame i dene Böötli aube Ässe u Trinke choufe). Hüt heimer o glert dases würklech guet isch z'Ässe dert z'choufe u s'nid scho mit z'näh. Mir si zum Strand glüffe u de muesme so a Feuse verbi u plötzlech heimers vordranne ghöre göisse u när isch ä Thai mitere Steischlöidere losgsecklet.....mir hei de eifach no paar Affe gseh mit Banane ir Hand (die si äbä vorhär ide Häng gsi vo dere wo het göisset)...;-)

Iz simer no zwe Täg hie u när chömemer (so de z'Wätter ou wott) am 24ä am Mittag z'Basu ah. Das wird iz vermuetlech dr letscht Blog-Itrag si (bis zur nächschte Reis ;-)). Dene womer nüm gseh wünschemer iz scho wunderschöni Festtäg u de ä guete Rutsch iz 2011. Häbet Sorg u bis gly.....

Liebi Grüessli a öich aui (u e chli Wermi...), Nadine & Chrigu

Thailand

So, mir heinis lang nüm gmäudet. Si no z'Perth gsi bi Kolege u hei de ni so Zit gfunge für z'blogge. Mir heinis dert ume fang chli anes normalers Läbe gwöhnet (ohni jede Tag witerreise u immer Täsche ume packe usw.). Ize simer z'Krabi u so z'sägä im Paradis acho. Aber bismer si da gsi isches auso no chli müehsam gsi.

Vo Perth us simer zersch uf Singapur gfloge. Dert heimer när übernachtet, wüumer ke Aschlussflug meh hätte gha. Vo Singapur us simer när uf Phuket gfloge womer de när ä organisierte Transfer für uf Krabi (Railay) hättä gha. Mir si usm Flughafe cho u mir hei gwüsst das de dert öpper mitme Schiudli ufnis wartet - äs het de öppe 200 Lüt gha wo mit Schiudli uf öpper hei gwartet. Hei de nach churzem üse Driver gfunge u dä hetnis uf Phuket Pier bracht. Dert hättemer z'Schiff söue ha für uf Railay. Leider heimer de dert no müesse 3 Stung warte bis das Schiff geit. Hei fang öppis z'trinke wöue ga hole u när het di nätti Thai-Frou gseit mit 1000 Baht Note chönime ni zahle u het üses Trinke ume i Chüeuschrank ta - wächsle hetme niene chönne...auso heimer haut nüt trunke.

Das Schiff isch de när o mau gange u de simer los. Churz vor Railay hets gheisse dr letscht Abschnitt machimer no mitme Speedboat. När simer zmits ufm Meer usse umgstige, samt Gepäck.

Z'Railay simer de när o acho u hei zum Glück no vorhär Flip Flops agleit u Turnschue id Täschä ta. Mä het nämlech müesse im Wasser usstige u dr Räscht zum Strand no loufe (u jedes Kilo wo üsi Täschä wär liechter gsi wär ä Erliechterig gsi). Irgendwie heimer de das Züg a Strand bracht (für d'Nadine ischs chli dr gröser Chrampf gsi aus füre Chrigu - äs heisech äuä au haub chrum glacht wo hei zuegluegt u ä Thaifrou het erbarme gha u isch när cho häufe trage).

Hei im Hotel ichecket u üses Bungalow bezoge. Hie simer mitme Drink u Erfrüschigstüechli empfange worde (si wüsse äuä fang wases fürne Chrampf isch aus übere Strand z'trage).

Üses beischeide schöne Bungalow ;-)

D'Ussicht vom Zmorge oder Znachttisch....

Üse Lunch wosinis für 5.- Fr. diräkt a Pool bracht hei ;-))

Hobart und Wineglass Bay

Da si schlächt Wätter hei gmäudet gha z’Hobart simer ni ufd Bootstour zu Bruny Island, sondern hei z’Alpenrail besichtiget. Das isch ä Modäuisebahn vomne Schwizer wo i öppe 100m2 d’bärner Aupe zeigt. Är het das aus vo Hand gmacht u äs hetnis uf au Fäu schwär beidruckt.

Am Nami heimer de z’Hobart chli wöue ga lädele, aber isch de ni viu gsi mit lädele….heis scho nach churzem gseh gha. Si de no a Hafe abe gschlenderet u när ischsnis komisch vorcho wüu dert au Strasse si gsperrt gsi. Hei de dunge gseh dass si äs rise Töffträff hei gha – mir si natürlech ou gange – z’Fuess!!!!!! Isch ganz intressant gsi u mir hei auso festgsteut, dasme z’Tasmanie äuä aus darf a Töff montiere wome grad e so wett – egau wi lut u gfährlech das isch.
Mir chöi o sägä das sich Tasmanie (im Gägäsatz zum räschtleche Oustralie) sech super würd eigne zum töfffahre. Äs isch hie nämlech no rächt kurvig u geit ni immer nume 750km gradus bis di nächschti Kurve chunnt…






Iz simer witer uf Bicheno womer de no di berüehmti Wineglass Bay gö ga luege.

So, u das heimer de hüt o gmacht. Si knappi 3 Stund gwanderet. Es het mau nid grägnet, aber äs isch bewöukt gsi. Leider müessemer sägä heimer ume mau viu z’höchi Erwartige gha. Di Wineglass Bay wär sicher wunder wunderschön, aber o nume we d’Sunne schint. Äs isch üs aues chli troschtlos erschine……wis haut e so isch we totau bewöukt isch.

Mir si de no witer zude Friendly Beaches u dert isches de grad e chli z’gliche gsi – da d’Sunne immer no nid het gschune.

Z’Highlight vom Tag isch fasch gsi wonis z’Känguruh het wöue hinge i Kofferrum gumpe. Si hinge ufdr Heckklappe ghocket u hei üssi Zmittagssandwich gässe da si plötzlech zwöi Känguruhs cho z’hüpfe. Si si geng wi nöcher cho u z’einte wär auso diräkt ineghüpft we dr Chrigu s’ni hätt verschücht….

Tasmanien

So mir hei üse Camper abgäh u das isch doch du no so guet gange. Hei de när der Wäg richtig Hafe gsuecht womer am Abe de ufd Fähre si Richtig Tasmanie.

Hei dert auso i tschegget u de när gmeint mir sige am Flughafe…….hei auso üses Gepäck müesse la ungersueche u de no üsi 2 letschte Bierli womer vom Camper nache no hei gha müesse abgä use de nach der Fahrt ume ga hole!!! ( die spinne doch!!!!!);-)) Derzue isch de no ds säge dasmer d Landesgränze nid überschritte hei!! Nu guet heimer das aues übernis la erga u si de uf das Schiff cho u hei üsi Kabine ufgsuecht. Da simer ds erschtmau sehr überrascht gsie!! Die isch auso sehr schön u o gross gsie. Hei de i auer Rueh düschelet u si när uf Schifferkundigstour . Hei ir Beiz öppis gässe (ä chline Salattäuer für 16.50$ (u wemer schribe e chline Salattäuer de meinemer o ä chline). Aber isch guet gsi. När het das Schiff de o scho abgleit u d’Nadine het scho gmeint s’heigi ds Stugeron gägä Seechrankheit vergäbe gno…..(ni dassi schomau Seechrank isch gsi, aber cha ja aus no wärde u me het vo vile Site ghört s’sigi e relativ Stürmeschi Überfahrt). Hei de no äs Käfeli gno u si de ga schlafe. Wärend der Nacht het du gloub d Nadine o gwüsst wägerum si das Stugeron gno het!!;-))Dä Kahn(200m läng u 30m breit) het auso fei gschouklet. Si aber du schlussändlech guet ds Devonport acho u hei de mau üses Outo gsuecht.

Nach der Outoübergab simer du ga Zmorge ässe u nächhär Richtig Cradle Mountain NP los gfahre. Dert acho, heimer mau ä Ungerkunft gsuecht u si aschliessend no ufene Wanderig. Bis itze erinneret Tasmanie üs chli a Jura u das isch doch scho bau chli Heimat.

Hei ufdr Wanderig im Cradle Mountain NP Wombats gseh - ganz nöch...

Si de witer uf New Norfolk – es chlises Stedli churz vor Hobart. Si no ni uf Hobart, wüu no ä Nationaupark drzwüsche ligt womer no hei wöue ga luege. Dert simer de hüt o härä u hei äuä so z’richtige Tasmanie gfunge (logisch hets ume grägnet, aber äs isch o im Rägäwaud gsi, drum heimers chönne verzeihe). Si wunderschöni Wasserfäu gsi u o süsch isch d’Wanderig düre Rägäwaud sehr schön gsi.

Ize simer z’Hobart imne Hostel. Isch schinbar (lut Tourist Office) so guet wi aus usbuechet oder de zautme 150$ fürnes Motel…. Hei aber hie äs eigets Zimmerli u ussertem Strasselärm ischs ganz guet.

Rägä

Dr letscht Tag vor Melbourne – und somit o z’letschte mau Campingplatz wächsle. Nichts ahnend simer ufgstange (wi geng, hei Zmörgelet usw.). Si iz Outo ghockets und……………………………………………………………………………………………………..nüt isch passiert. Nach paar komisch ustuschte Blicke none Versuech………………………………………………………………………..immer no nüt passiert. Mir hei wedr dr Radio no z’Liecht oder süsch öppis la loufe u dä sch….. Chare isch eifach nid gange. Auso heimer mau dr Campingwart gfragt öbernis cha häufe, dä isch de mit sire Mühli cho u hets probiert, aber isch geng no nüt passiert (dr Chrigu wett no gseit ha daser vo Afang a het gseit gha das di Kabu z’dünn sige!!!). När heimer no di nätte Schwizer näbädranne mitm gliche Camper gfragt öbmers mit ihrem o no chöi versueche (natürlech mitm Campingwart sine Überbrückigskabu – hei natürlech keni mit übercho), aber das het ou nüt bracht.
Auso heimer äs witers mau mit de Apollo Kontakt ufgno une das Problem gschiuderet. Nach knapp ere Stung isch dr australisch TCS cho u nachdr zwöite Batterie woner het aghänkt gha hets de o klappet zum überbrücke. Mit der Empfählig, z’Outo bis uf Melbourne nüm abz’steue simer de los.

Hei ungerwägs no müesse ga ichoufe. S’het leider ke Woolworths gha womer immer gö ga ichoufe u nach churzem umeluege heimer aber de ä ALDI gseh. Hei üses Glück dert probiert u müesse auso sägä, das isch ni z’dümmschte gsi womer i dene Ferie hei gmacht. Z’Brot womer dert hei gchouft isch z’beschte gsi womer bis ize hei gha u uf aus ufe ischs o wäsentlech günschtiger gsi aus süsch aube.

Hei de gott sei dank z’Outo wider chönne vo säuber ala u si witer no iz Royal Australian Air Force Museum. Hetsech aus ganz intressant erwise u das dusse i Ströme rägnet heimer üsi Zit auso guet chönne so vertribe.

Vilech muesme no sägä wemer scho bim strömende Rägä si, dases hie zwüschedüre rägnet wi ir Schwiz, auso rächt heftig. Aber im Gägäsatz zur Schwiz kenne si hie ke Strasseentwässerig – o ke Trottoirentwässerig. D. h. mir wüsse iz werum dass si überau „floodway“ aschribe. U mir wundere üs werum das hie ni meh Lüt mit ganz höche Gummistifu umeloufe. Äs het eifach mängisch so rise Glüngge, oder bessergseit Wasserlöcher, das weme dürefahrt me fasch nüm gseht wüus so sprützt u die ringsume hei de ume mau d’Fassade abegwäsche.


Dr Tag nachdäm dr Camper isch kabutt gsi – dasmau isch dr Camper nass gsi u zwar vo inne!!! Äs het grägnet, wi scho ufdr Great Ocean Road u äs het eifach ni wöue ufhöre. Di ganzi Nacht hets grägnet u womer am morge si ufgwacht hets immer no grägnet. U z’mau heimer gseh das aus nass isch im Camper inne – u zwar ni wi süsch eifach nume kondänzwasser…hei de afa sueche u hei z’Leck, resp. di 2 Lecks, de o gfunge – dert wo z’Ufsteudach mitm Camper verbunde sött si.
Heinis de ni la beirre u no einisch chli witergschlafe (Nadine ;-)). Nächer heimer usgibig zmörgelet – wos immer no het grägnet – u drzue Campingplatz-TV gluegt(d. h. mä luegt dä Mit-Campende zue wis ihne so geit (natürlech vom Schärme us) – z. B. z‘4. imne Van wovo zwöi ir usboute Dachbox hei gschlafe u zwöi unge zwüsche Stüeu u Bänk. Si hei de afa Platz mache u fang ihres Gepäck vore Van gsteut – äs het übrigens immer no grägnet – u vode Bire id Schnitz gluegt)…

Si de när mitm Bus uf Melbourne iz Zentrum ine u hei dert d’Sehenswürdigkeite agluegt – mitlerwile hets nüm grägnet, oder emu nüm fescht.
Eigentlech isch scho z’Busfahre äs Erläbnis gsi. Womer häre si heter plötzlech aghaute unis ine angere Bus gschickt, wüu sine agäblech kabutt sigi. U womer de si heicho simer plötzlech vor Route abcho u imne rise Bus-Parkplatz gstange. Nach churzem wärweise heimer de gseh dassi dert hei Chauffeurwächsu gmacht – zmits währendem Fahrplan…..si äuä eifach d’Oustralier.

S'het dasmau haut leider keni Föteli gäh, aber di wärä i däm vile Rägä sowiso ni wük guet cho...

Great Ocean Road

Hie heimer no ä chlini Ergänzig zum letschte Itrag vo Kangaroo Island. Am Sunnti bevormer uf di tüüri Fähre si für zrügg ufz Festland simer no ad Seal Bay. Hei dert ä Guided Tour gmacht - di isch meh oder weniger drus bestande das eini het gseit i chume iz mitnech a Strand u dert dörfter ni nächer ad Seehüng häre aus ig u wedr Frage heit steuet die...... Aber äs isch glich super gsi. Hei di Seehüng vo ganz nöch gseh u chönne fötele....:

Ume ufem Festland heimer wöue z'Victor Harbor übernachte für när witer i Grampians NP. Das hetsech de aus schwiriger usegsteut aus dänkt - South Australia het Schueujahrändi gha u de gö aube au Schoolies (wisine sägä) uf Victor Harbour ga zäutle. Es si auso aui Zäutplätz räschtlos usbuechet gsi. Si de öppe einähaub Stung umegfahre bismer ändlech hei ä Campingplatz gfunge womer no hei platz gha.

Si de witer i Grampians National Park. Hei de langsam festgsteut dases nüm so eifach isch üsi Asprüch z'befridige - mir hei scho so viu gseh u so viu Idrück gwunne, dasmer irgendwie äuä wählerisch wärde u nüm so eifach z'fasziniere si. Äs isch schön gsi...

Voller Fröid heimeris när ufe Wäg ad Great Ocean Road gmacht - aber wi chönnts o angers si we mir zwöi eis vode wahrzeiche vo Australie gö ga luege - äs het gschiffet!!!!!!!!!!!!!!!!!!!!!!!!!!!!!!!!

Si de glich de Apostle usw. nache u hei z'beschte us däm Wätter gmacht...

Womer de no si ga tanke het dr Tankwart dr Chrigu grad wöue asteue....är het sini Häng agluegt u gfragt waser schaffet. U woner het ghört daser Mech isch ischer fasch im vieregg gumpet. Är het de grad ufzeut waser no aus z'flicke hätt u het gfragt was Chrigu fürne Überchleidergrössi het ;-)). Am Schluss heter de gfunge mir sigi ja no jung u chöni grad da häre cho wohne u si Lade übernäh....heinis de nach richleche Überlegige drgäge entschide ;-)))...

Kangaroo Island

Kangaroo Island









So, mir hei lang nüm gschribe, drfür heimer dasmau ume chli meh z’verzeue, resp. viu Biudli z’zeige. Z’Adelaide heimer ni so viu gmacht. Heis vor auem gnosse ume mau chli zrügg ir Zivilisation z’si. Si id Stadt chli ga lädele u no i Zoo. Het chli öppis gchoschtet, aber äs isch ä wunderschöne Zoo u mir hei ganz viu gseh.

Vo Adelaide us simer witer via tüürschti See-km uf Kangaroo Island (vom Festland sis 16km u mir hei 348 AUD zaut für üse Camper u üs zwöi!!!!!!!!!!). Aber äs hetsech natürlech glohnt.
Womer si acho simer am Abe uf Kingscote iz Penguin Centre. Hei dert ä Füehrig übercho u Pinguine chönne ga luege wisi eifach so läbe. Het leider ni gueti Fötelis gäh, wüume ni mit Blitz het chönne fötele – u da ds Ganze ir Fischteri isch gsi hetme o dementsprächend weni gseh…
Am erschte ganze Tag womer hei gha hie simer d’Kelly Hill Caves ga luege, isch so chli ähnlech wi d’Beatushöline. Het Stalagmite u Stalaktite u Heliomite (di wachse horizontau oder eifach chrüz u quer). Hei dert ä Füehrig gha u das isch sehr interessant gsi. Dr Guide het aube Spässli gmacht u für sini Usfüehrige dr Sponge Bob u Ice Age brucht.

Vo dert us simer witer ufe Camping Platz wos ä Koala-Walk het. Hei zwar ufm ganze Walk nume ei Koala gseh, drfür hetersech rächt guet i Szene gsetzt:

Am nächschte Tag simer i Flinders Chase National Park. Hie hätts gaaaanz viu Sache z’gseh gäh, aber het natürlech ni für aus glängt u drum simer zum Admirals Arch (dert läbt ä Kolonie vo 7000 New Zealand Fur Seals) u zude Remarkable Rocks. Isch aues sehr idrücklech gsi u besser z’erkläre mit Biudli aus mit Text.

Womer ume zrügg zum Camping si heimer de no dr richtig offizieu Koala Walk gfunge u dert hets de o meh Koalas gha. Di meischte hei aber gschlafe. Drfür hets no ganz viu Känguruhs gha wome ganz nöch het zuche chönne.

Outback

Auso, mir si de los zum Kings Canyon. Da mir es 4X4 Fahrzüg hei gmietet natürlech überne so genannti unsealed Road – eifach ä unteereti Strass, wimesech die z’Oustralie so vorsteut. Am Afang isch das ja no luschtig gsi, aber di letschte 40 vo 200km ischs eifach nume no zum göisse gsi……












Es het eifach ghudlet u tschäderet u womer si acho heimer bau aus müesse nöi iruume hinger im Camper u mit putze heimer ou ume vo vore chönne afa, da d’Camperbouer s’nid für nötig hei gha rings um d’Leitige abzdichte das dr Sand nid inechunnt. Mir hei ni nume ir Kabine rote Sand gha, sondern ou i dä Schäft, ufem Gschirr, uf de Läbesmittu usw. Dr einzig Ort wo isch verschont blibe isch gloub dr Chüeuschrank gsi. Houptsach es het gfägt ;-). Usserdäm heimer uf dä Wäg Tierli troffe womer süsch ni hätte gseh……hei ä Herde wiudi Kameu gseh, resp. fasch überfahre u när hets ganz viu wiudi Rössli-Herdene gha.












Im Kings Canyon acho, simer aus erschts ufe Campingplatz. Da d'Wättervorhärsag 41 Grad isch gsi, heimer de nume ei Nacht buechet u hei de hüt o nume di stündegi u ni di längi 4stung Wanderig gmacht. Es isch auso sage und schreibe am Morge am 8i über 30 Grad gsi.
41 Grad chöiternech öppe so vorsteue: mä schwitzt immer no, aber me merkts nid wüu dr Schweiss verdunstet bevorer überhoupt sichtbar wird. Oder weme d’Häng wäscht u kes Tüechli het zum abtröchne geits öppe 30 Sekunde u när sisi troche (ohni dasmese het am Shirt abtröchnet).









Si de nachdr Wanderig witer richtig Uluru. Hie acho, heimer wider sofort dr Camping buechet u wägdr unerträgleche Hitz beschlosse, mau chli am Pool z’verwiile. Si hei morn wider über 40 Grad im Schatte gmäudet u ufe Uluru chame ni ufe (d’Schmärzensgränze ligt schinbar bi 36 Grad u dert simer ize dütlech drüber). Mir gö auso de eifach mau ga luege wasme dert so cha mache. Uf jede Fau gömer de o no zude Olgas.

Nachdäm mir mitlerwile sowou d’Krokodiu, d’Schlange, Chrött u Riseheuschrecke hei hingernis gla (d’Flöige si immer no stetegi Begleiter) heimer iz no d’Ameisi atroffe. Di si aber o ersch ad Oberflächi cho wos het abegchuelet (uf 30 Grad). Das isch aber so schlimm, dasme nüm cha dusse hocke (ussert mä het d’Bei ufe). Weme 5 Sekunde blibt am Ort stah, hetme mindestens 20 Ameisi a jedem Bei. Mir heis auso mit chochigem Wasser u Anti Brumm probiert, aber es het aues nüt gnüzt. Drum hocke mir ize im klimatisierte Camper inne u tüe Blog schribe.

Tag 2 bim Uluru; mir hei einisch meh gmerkt – verschiebe nie auf morgen, was du heute kannst besorgen ;-). Simer doch hüt am Morge ufgstange u es het i ströme grägnet!!!! Hei dänkt das vergeit de u hei langsam zmörgelet unis parat gmacht, aber leider ischs nume no fasch meh cho. Si de glich los richtig Uluru u Olgas. Für paar churzi „Wanderige“ hets glängt, aber es isch auso nüt schöns gsi. Hei de dänkt mir gö zrügg u frage im visitor centre was morn für Wätter wird – genau glichi Gwitter wi hüt u 80% Räge……. Si de i Camper u plötzlech hets gägä di haubi 5i afa schön wärde. Mir hei de blitzartig gchochet u när abgwäsche u si ume losdüset richtig Uluru. Heine de tatsächlech im wunderschöne Abesunnerot verwütscht u d’Stimmig probiert z’gniesse – mit öppe 80 angere Lüt undeme Heli im Himu ;-). Isch würklech äs wunderschöns Schouspiu däm zuez’luege winer sini Farb vo Sekunde zu Sekunde änderet, bis d’Sunne furt isch u no chli lenger.









Morn gömer definitiv richtig Süde, d. h. scho fasch Adelaide, witer.

Hüt nume ganz churz……
Ussert 750Km gradi Strass isch nid viu ds erläbe gsie. Si itze ds Coober Pedy u luege mau öber no sone Opal Mine chöi ga luege.

Di längi Fahrt i Süde

Hüt simer no einisch i bös Schlange-Nationaupark zrügg. Dasmau aber nid ga loufe, sondern ufne Boot-Tour. Si so dür Schluchte (ok, bi üs wärs eifach normali Flüss wo chli „töifergleit“ si) u när no bimne Wasserfau ga bade. Isch schön gsi, aber ni extraordinär…










U wüumer äbä süsch ussert wäsche ni so viu erläbt hei, tüemer iz eifach z’hiesige Läbe no chli dokumentiere.

Es isch ungloublech wi tüür das hie Bier isch – für es 6er-Gascho Büchse zautme hie 16$ u fürnes 30er Pack 40$ (aber das isch de abegschribe gsi). O Wasser isch extrem tüür, aber das hani scho vo letscht mau gwüsst. Augemein o angeri Läbesmittu si türer aus bi üs – v. a. Frücht, Gmües, Milchprodukt, usw. Fleisch isch drfür ehner günschtiger (emu Rinds).

Süsch simer eifach so chli vornis am häreschwitze. Hie z’Katherine isch um di 40 Grad am Schatte, d. h. me ma chum vom Camper zum Pool loufe ohni zwüschinne fasch e Hitzestou z’ha. Morn fahremer richtig Alice Springs. Aber das si no guet 1200km, drum legemer de äuä no ä Zwüschestop i.

Widr obe gseht, chöimer ni vo sövu Action brichte wi die zwe Täg vorhär, aber das mues ja o nid grad immer si…
Mir hei du dä Zwüschestopp ds Tennant Creek igleid, nach däm mir ä ganze Tag lang immer u immer wider eifach immer nume si gradus gfahre u zwüsch ine mau no äs Steppefüür une toti Chueherde hei gseh…..










…… nach däm mir das am zwöite Tag widerhout hei simer du ändlech ds Alice Springs acho u hei wies nid angers chönnt si üse Camper müesse ga la flicke!! Der Chrigu hät das zwar äuä gschider säuber gmacht wüu die Aussies hei auso sage und schreibe 1.5 Stung gha fürne Batterie ds wächsle u no drümau ä nöi Batterie gha hole wüusi die fauschi hei gno!! Das spricht nid grad für das Land u sini Bevöukerig!!










Devils Marbles - e Sehenswürdigkeit ufm länge grade Wäg...

Morn blibemer no ä Tag ds Alice Springs u de gömer de zum Kings Canyon, Ayers Rock und Olgas… de simer de vilech nümm grad immer erreichbar wüumer de das ganze uf Outback Strasse wei erreiche so dasmer de dä Auradcamper o mau chöi teschte!!;-))










So gsehts ir Dämmerig us - ke Fotomontage....