Melbourne

Mir si iz zwe Täg hie z’Melbourne u chöme üs auso vo derä Stadt chli verarscht vor…. Hei am erschtä Tag, d.h. geschter, Sightseeing u Shopping gmacht. Leider heisi de am 6i aui Shops zuetah – z’Bärn hei ja au Läde bis am 7i offe!!!!!!! Heinis de auso ufe Heiwäg wöue mache. Hie gits sones City Circle Tram wo gratis isch. Das fahrt eifach um di ganzi Stadt u git immer so Lutsprächerussage düre wo di touristische Sache si. Da mir auso ganz obe ar Stadt si gsi (u üses Hotel ganz unge) heimer uf das Tram gwartet. Si de igstige u womer öppe am üsserschtä Ändi vor Stadt si gsi hets gheissä äs sig iz Ändstation, dr Trambetrieb sig für hüt igsteut….. Leider isch dert när ou kes angers Tram gfahre (auso die wome hätt müesse zahle) u drum simer när haut dür di ganzi Stadt z’fuess heiglüffe – u äs isch uuuuuuuuuuuuuuuu chaut gsi!!!!!!!!!!!!!!!!!!!!!

Womer de nach langem mau si deheim gsi heimer im Hotel gfragt öbmer none Nacht chöi verlengerä u wi chönnts ou angers si, äs isch aus usbuecht…

Hüt simer nomau los. Zersch simer iz Aquarium u si de när witer für no paar Sache ga azluegä u ume chli ga z’shoppe. Leider heimer de usegfunge dasmer geschter scho sämtlechi Shopping Malls u Ichoufszentre hei düregnoh……Bern het besseri Shopping-Müglechkeite.
Si auso iz gar nüm so unglücklech het z’Hotel ke Platz meh für üs. De gömer haut morn witer u ume ga campe.

Viu meh z’säge gits eigentlech ou ni. D’Stadt isch härzig, aber isch weder wäuts schön no sehr ufregend. Haut grad so guet weme süsch nüt z’tüe het ;-))). Mou, was natürlech super isch…..hie hets grad im Ichoufszentrum näbem Hotel ä Pancake Stand woni jede Morge mini über aues gliebte Pancakes mit real Canadian Maple Syrup bechume……;-)

Hie gsehtme äs isch scho gli Wiehnacht…..

Ds wär de äbe das berüchtigte City Circle Tram

Kangaroo Island \ Great Ocean Road

Eigentlech hani öich ja scho vorgeschter wöue schribe. Mir si ufme Camping gsi wos het Wireless gha. Bzw. heimer das müesse choufe u de hetsech usegsteut dasme äbe ihre PC mues näh für iz Netz. Dä isch de so langsam gsi dasmer eigentlech zu nüt sic ho…. U iz chumi ändlech ume mau drzue öich z’schribe.

Mir hei auso dä Tag z’Adelaide gha u am nächschte Morge de müesse ga z’Outo hole. Si dert häre u hei das Outo gno – bi aus erschts gfahre u ha äuä Bluet gschwitzt. Z’fahre ufdr fausche Strassesite isch no z’eifachschte dranne. Müehsam isch am Afang dasme im Outo ufdr fausche Site hocket….mä het ke Ahnig wiviu Platz no isch näbedranne. Wenigschtens heimer ä Outomat, de faut das mitm schaute schomau wäg. Hei 2-3mau gschibewüscheret anstatt blinket, aber süsch isch eigentlech aus guet gange. Verfahre heimeris ou no ni – auso fasch ni, hei grad womer z’Outo si ga hole ine Supermarket wöue u si de zmits im Zentrum vo Adelaide glandet……hei z’ichoufe de vertagt ;-). Bis iz simer ämu no läbig u aui angerä ou – abgseh vomne Leguan oder Kamäleon wo d’Ari het überfahre une Vogu wonis isch id Windschutzschibe gfloge.

Ig mit üsem Luxusschlitte ;-)

Ds si de di unändleche Strasse

Mir si när diräkt uf Kangaroo Island. Dert heimer de ou scho Seelöie, Koalas, Kangaroos u Pinguine gseh – u mir si ni imne Zoo gsi ;-)))). Si doch no froh gsi heimer ou mau läbigi Kangaroos gseh…..am Strasserand hets äuä so au 500m äs tots gha…..

Am Abe heimer när mau üses Zäut ufgschlage u chlinerä Schock gha…..mir si ja wük beidi ni gross, aber z’Zäut isch seeeeeeehr chli (sorry Sandra, muesch de äuä d’Bei azieh…). Hei mit däm Camping-Set zum Outo eigentlech aus becho wasmer bruche…Gaschocher, Pfanne, Täuer (Porzellan!!!), Gleser, Tassli, usw. Leider nume sehr dünni Mätteli für zum schlafe, auso heimer geschter 50$ investiert u zwe Luftmatraze une „Föhn“ wome am Outo cha ahänke zumse ufblase.

Hei dert ufm Camping festgsteut das würklech no ni Saison isch….het eigentlech nume auti Lüt – u de meini wük auti!!! So 70i…..am Abe womer si ga zähnputze het z’Grosi näbedranne im Badmänteli ihri Protese usegno u die gschrubbt ;-).

Mitlerwile simer ou scho so richtig igfleischti Camper….hei sogar aube deluxe Zmorge mit Capuccino – u Chocco topping ;-).

Zwüsche düre müessemer ou wäsche u de vertribemeris d'Zit haut mit Banane ässe...

Üs geits wük u guet u mir sis vou am gniesse. Z’Wätter wird geng wi besser…d.h. äs wird geng wi wermer, we ni sogar heiss.

Mir si när witer ufd Great Ocean Road. Das isch würklech u schön, aber leider seeeehr touristisch. Si unger angerem i Rägäwaud u hei de ume Koalas (mit Baby!!!!!!) u Kangaroos troffe ;-). Hüt heimer eigentlech nomau wöue campe, aber leider hetnis dr vorgsehnig Ort ni gfaue u drum heimer grad dürezoge bis uf Melbourne…. Si vou i Fyrabeverchehr cho…. Hei ou scho äs Hotel usgsuecht gha, aber irgendwie heimer das de ni gfunge u nachdäm mer öppe 3mau amne angerä (wo 2. Wahl wär gsi) si düregfahre heimer beschlosse das das äs Zeiche isch umer dert ine gö. Auso simer iz hie z’Melbourne im Hotel u blibe so für 3-4 Tag mau ume ir Zivilisation ;-).

Mäudemi de ume sobaus News git (weni de denn ume iz Netz chume)…

Adelaide

Womer z’Adelaide si acho, heimer eigentlech nüt angers gmacht aus schlafe u das dr ganz erscht Tag lang.. Si vom Flughafe diräkt mitm Taxi iz Hotel u hei de zum Glück scho am morge am 10i chönne icheckä. Si när nume hurti ga Wasser u paar Frücht – Notproviant – choufe u diräkt iz Bett. Ha de am Morge feschtgschteut dasmer tatsächlech 20 Stung hei düregschlafe…d.h. mir hei über 24 Stung nüt gässe – u mir läbe tatsächlech no!!!! Hei de aber glich dr Tag mit Pancakes u Muffins gstartet. U si sogar muetig gsi u hei äs Cappucino bsteut, wo rächt lecker isch gsi!!

Hei de am Nami z’Adelaide Downtown rächt spezielli Vögu gseh….u hei nachme Zitli beobachte aus Vogukenner usegfunge dases Papageie si. U nachdäm üs das lang komisch vorcho isch dases eifach so Papageie het, heimer gmerkt dasmer ja z’Oustralie si u dases da so exotischi Sache git ;-))). Das Ganze heimer de ou bestätigt becho wo ä Pelikan a üs isch verbigschwumme womer si am Fluss ghocket…

Di erschtä Strasseüberquerigs-Üebige heimer ouscho hingernis. Zersch heimer ja scho i di richtigi Richtig gluegt, aber hei de glich äs Gschtürm übercho u äuä aui angerä Lüt ou no verwirrt. Si ämu heil däne acho.
Wi dr Strasseverchehr isch hie ou aus angerä irgendwie dr verchert Wäg….zersch chame dr Wasserhahne lang ni ufdräie, bisme de merkt dases dr anger Wäg ume geit u we ds Wasser de mau louft u me fertig Häng gwäsche het, wirdme no grad duschet – mä sött äbä de dr Hahne ou ume dr anger Wäg zuetue u ni no feschter ufdräie…

Süsch ischs hie super….ämu z’Wätter spiut bis ize vou mit. Hei geschter 33 Grad gha (das wär äbe de denn gsi womer dr ganz Tag hei gschlafe) u hüt ischs ou so umdi 25 Grad gsi – schetzi ize mau. Si mit churze Hose u FlipFlops wou gsi. Hei ä Stadt, resp. Shopping Rundgang gmacht u gseh dases tatsächlech z’Billabong-Land isch ;-)). Si aber hert gsi mitnis u hei no nüt gchouft….sogar bir Ari hets übernä haube Tag brucht bis si öppis het gfunge ;-).

Leider isch aber Wasser hie wi ou z’Kanada extrem tüür. Mä chönnt zwar Leitigswasser trinke – sägesi ämu – aber de hetmä när ä Chlorschock…. U we das mitm Wasser so witergeit, chanimer eh ni viu choufe hie…..7.5 dl choschte nämlech $3.50…!!!!! Mä chönnt ou angers näh wo günschtiger wär, aber leider sisi hie die Läde ni wük fähig z’Züg mit Priise azschribe…u de ischs immer chlines rate.

Morn stürzemeris de i das Verchehrsabetüür…..gö am morge z’Outo ga hole u machenis de när ufe Wäg für ufd Kangaroo-Island.

Für aui wos scho immer het intressiert - so gsehts us weni am Blog schribe...

Singapur

Hoi aui zaeme.... Mir si iz scho sit irgendwie 5 Stund hie z'Singapur am Flughafe u muesse immer no 3 Stung warte. Da di Singapurianer so guet usgrueschtet si mit free internet, fani doch scho mau afa blogge....leider haut no ohni Foeteli (u ohni ae, oe u ue's :-)).

Mir hei ae horror 12stunde Flug gha...auso mir ischs aemu so vorcho. Ha natuerlech widermau ae Mittuplatz gha....links naebedranne isch zwar d'Ari gsi...somit no ganz ertraeglech, aber raechts hani ae ganz muehsame komische Schwizer gha wo u huerae viu Platz het brucht (no oeppe d'Heufti vo mim Fuessruum !!!!!). Z'Aesse isch furchtbar gsi...u dr Service suesch ou. Si hei nume 2mau ae Baecher Ztrinke bracht (me het ja i 12 Stung o ke Durscht!!). Hei zum Glueck no viu Wasser gchouft gha nachm Check-In.
Z'einzige wo eigentlech kuul isch gsi si d'Fiume.......het ae Uswau vo ca. 120 Fiume gha....u dasmau hani auso ou ae eigete Fernseh gha!!! Somit hani wenigschtens choenne TV luege, weni scho ni cha schlafe....bi iz umsomeh mued u de froh wemer aendlech z'Adelaide im Hotel si!!!

Ha sogar gschafft mini 1.2 Kilo Uebergepaeck (dasmau sis wahrschinlech wuek di churze Hose...) z'Zueri duere z'mogle.....i kenne di Trickli iz fang ;-). Leider heisi no z'Handgepaeck gwoge u das isch natuerlech viu z'schwaer gsi.....auso hani no paar Sache a Bode usglade u nachdaem si hei gluegt gha hanis eifach ume ipackt.....sorry, waer luegt scho wiviu Handgepaeck me het??????

Ja, u suesch gits ni wuek viu z'Verzeue.... Si vori mau no ufd Plattform use u s'hetnis fasch umghoue....isch 28 Grad u s'het oeppe 700% Luftfuechtigkeit...

Auso, haebet aui Sorg u goet de fuermi chli a Gluehwiimaerit - u Zibelemaerit natuerlech ou!!!!!