Back home

So, iz bini knapp ä Wuche ume deheim....eigentlech bini scho vou acho, isch ou gar ni komisch gsi. Aber ig lide immer no chli ungerem Jetlag - hani gwüsst das das so lang geit. Ha zwüschdüre so Afäu dasi am morge am 4i häuwach bi u scho fang ga ga Zmorge ässä (ha ja süsch nüt bessers z'tüe).

Uf au Fäu hani öich no Föteli versproche...

So het mi Trek-Trip agfange ;-). Nachdämi mitm gfährlechä Greyhound (z'Manitoba het ä Asiat amne Kanadier im Greyhound dr Chopf abgschnitte - mitme Mässer - u isch mitm Chopf när im Bus hin u här glüffe....) vo Vancouver uf Seattle bi u ar Ami-Gränze 2ähaub Stung ha gwartet hanimers aber ja ou verdient gha - u ig ha ja denn no ni gwüsst dasi de nach zwe Wuche chum no weis was fliessend Wasser unes richtigs Bett isch...

Das isch gloub eifach so z'typische wo jede vo Kanada erwartet - s' hout eim när glich um wemes so atrifft, u uf de Fötelis bringtmes eifach ni so guet übere wis wük isch...

Da simer ga whitewater rafte. Ds isch absolut dr Hammer gsi - no fasch besser aus töfffahre ;-). U nei, das ligt iz ni a üsem guetussehendä Guide womer dert hei gha, s'wär ou süsch guet gsi. Zwüschdüre hetsnis fasch gchert u mä hetsech veiechli müessä häbä (zwöi si über board gange), aber isch glich kuul gsi. Eifach relativ früsch - 12grad im Wasser. Da mä aber eh di ganzi Zit nass isch ischs de miter Zit nüm so chaut u drum bini ou mau chli näbem Boot gschwumme (imne ungfährleche Teil natürlech)....bi leider när fasch nüm iz Boot zrüggcho u de hetmi dr Guide ganz blöderwis müesse inezieh ume - wär schomau isch graftet weis, dasme när däjenig wo eim iz Boot zrüggzieht grad flachleit ;-)).

Das isch äuä dr auerischlimmscht "Camping" gsi woni je ha erläbt. Eigentlech ischs nämlech gar ke Camping gsi. S'isch z'Jasper u dert heisinis ufne overflow Camping verfrachtet wüusi überbuechet si gsi - mir hei weder Duschine, no WC nimau fliessend Wasser gha... Uf aus ufe - wär hätts ou dänkt - hets so huerä gschiffet womer si acho das natürlech sämtlechi Zäut si pflotschnass gsi (vo inne natürlech)...

Typisch Rocky Mountains. Ig würd sägä d'Schwizerbärge hei scho ä gwüssi ähnlechkeit, aber si si höcher u würke agressiver, wobi d'Rockys eifach viu witer "gströit" si....isch haut ä angeri Dimension.

Das isch einä vo dä überus nätte Kamerade wonis z'Banff het äs Loch iz Zäut gfrässe u aui Cookies het usegstohle....

Das obe wäri eigentlech ursprünglech dr Wäg gsi wome hätt söue düreloufe....

Das isch uf üsem 2tägige Kanutrip gsi. Isch äuä eine vo de bessere Usflüg ufm trek gsi - obwoumer 3h am Stück hei müesse padle. Ei Tag isch das ja no super, aber am nächschte Tag heimer ume zrügg müesse - mit Muskukater hets no viu herter. Hei aui üsi Zäut, Mätteli, Schlafseck, Gepäck, Chochutensilie usw. müesse mitnäh...het veiechli ä Ladig gäh.

Hei dert aber när ir Wiudnis zäutlet u am morge weme het z'Zäut uftah hetmä die Ussicht gha...

Das isch üsi rise Chuchi gsi womer hei müessä für 14 Lüt choche - isch eifach aube tümmer gsi wes het grägnet, de isch z'Ässä eifach aube chli wässrig worde...

Hie simeris ni einig worde öbs äs wiblechs Cariboo oder ä wiblechä Euch isch gsi - ämu risig u eifach grad näb üsem Zäut.

Das nenntsech City-Camping. Dr Camping z'Vancouver het leider ni meh Platz gha u drum heimer d'Zäut fasch überenang müesse ufsteuä!!

Pancakes vermissi scho ize...

Einisch heimer no ire Blockhütte gschlafe - aui si froh gsi umne trochni Nacht...;-)

U das isch no dr Afang vor kanadische Wüeschti z'Kamloops

Rockys

Bi ize grad z'Whistler ir Library.....drum chani euch hurti e Rueckmaeudig gaeh. D'Umgaebig hie isch wunderschoen, v.a. Jasper u dert wome haut so richtig ide Baerge isch - z'Waettter isch aber ja wou z'auerischlimmschte woni je ha erlaebt. Hei di letscht Wuche immer pflotschnassi Zaeut gha wueumer hei muesse d'Zelt im groeschte Raege ufsteue. Isch um di 10 Grad gsi (Tagsueber natuerlech) u dementspraechend chaut ir Nacht.

Einisch simer ufne overfloat Campingplatz verfrachtet worde wueu suesch aus isch zue gsi, s'het weder Duschine no WC's gha - nimau Wasser!!!!!! Hei zum Glueck nur ei Nacht muesse dert si.

Vorgeschter simer ufne 2taegige Kanu-Trip u hei de ir Wiudniss zautlet - dasmau aber gewollt. Ha ja ni gwuesst das paddle so astraengend isch.......hei 4h unungerbroche muesse paddle, mitm ganze Gepaeck an board (Zaeut, Maetteli, Schlafseck, Gaschocher, Chueubox, Chleider usw.).

Iz isch z'Waetter besser, scho fasch z'warm, aber ig wott ni afa jammere....immer no besser aus so huere chaut.

Si e Gruppe vo 14 Luet - u hocke au i eim Outo.......me het ni wuek viu Platz.....aber heis immer luschtig.

Ha sogar iz ou mi Baer gseh.....sogar mitme Baerebebe. Si grad vor uesem Van ueber d'Strass glueffe. E Hirsch het 1 Meter naeb uesem Zaeut Znacht gaesse u d'Streiffehoerndli hei aes Loch i ueses Zaeut gfraesse u aui Cookies gstohle.......zum Glueck, hei naemlech denn a dem Abe ae Grizzly-Warnig becho uf uesem Zaeutplatz.

S'isch definitiv a wildlife trip, aber so wit so guet.....maengisch chli z'viu Natur, bzw. z'viu Raege. Aber iz goemer de no witer uf Vancouver u de uf Seattle u de chani de dert im Hotel ume chli i Jacuzzi. U sobaudi de i chli meh ausere Wuche ume zruegg bi chani de ou afa Foeteli ufelade u das aus no chli besser usfuere.

Haebet Sorg u gniesset dr Summer no...