Vancouver Island - Victoria

Mir hei ume mau Feriä gmacht - u si dasmau uf Vancouver Island (widermau ;-)). Si uf Victoria - Houptstadt vo British Columbia. U da z'Wätter iz ändlech ou guet isch bi üs, d.h. ni nume schön sondern ou warm (scho fasch z'warm mit 30 Grad) ischs wäuts kuul gsi. Si für zwe Täg überä....isch fasch perfekt gsi, aber (wi chönnts ou angers si, ig mues ja immer öppis ha...) ig lide grad are Mosqito-Attacke vom Samschti. Bi 20 Stiche hani ufhöre zeuä....wük, das isch ganz abartig. U s'si ni eifach so normali Müggeli wi mir ir Schwiz hei....d'Stiche hei hie ä Durchmässer vo 5cm....chöitnech auso vorsteuä wi agnähm das isch. Ha natürlech ke Anti-Brumm gha....ha au di wichtige Sache ir Schwiz vergässä (ha z.B. ou kes Sackmässer gha - drfür di churze Hose woni ja scho so mängisch ha chönne bruche hie!!!).

Ig weis ja ni werum das d'Kanadier z'ganze Jahr düre Wiehnachtsbelüchtig hei....ig ha ja dänkt das mini Nachbare hie eifach z'fuu si fürs abez'hole, aber z'"Bundeshus" vo Victoria isch ou no belüchtet!!!!

Mir si auso dert acho u hei mit Schock festgsteut das üses Hostel zmits in ChinaTown isch (ChinaTown isch hie eifach überau chlines meh bessers Ghetto). Hei ämu de eifach üses Gepäck mau dert gla u si Downtown. Dert heimer müessä zwöimau luegä...ha wük ufe erscht Blick gmeint dr Johnny Depp louftmer überä Wäg....di hei irgendwie äs Fescht gha wosi so öppis wines Priate Battle hei gha. Si si de när ou mit denä riiise Säguschiff ufz Meer use u hei afa umebömbele...hei veiechli gchlepft. Isch no idrücklech gsi, aber isch ewig gange bis die usglüffe si gsi - het ni so viu Wind gha geschter...u für use heisi dr Motor ni chönne bruche.

Einä vo dert hetnis gseit s'sig paar vo de Originau Schiff us Pirates of the Caribbean. Weis ni öbs stimmt, cha guet si - si hei nämlech genau so usgseh u im Hafe hets äs Schiff gha wo wük chönnt d'Black Pearl si.

Heinis ämu nach däm Tag uf üses Bett gfröit. U womer si iz Hostel cho ischs i däm Zimmer wermer gsi aus dusse (dusse isch 30 Grad gsi geschter....). Si no mit 4 angernä im Zimmer gsi u di si vou unfründlech gsi, drum heimer natürlech nimau chönne lüfte. S'isch i däm Zimmer immer wi wermer worde u ig bi würklech eifach ufm Bett gläge u mir isch dr Schweis nume so abeglüffe - di ganz Nacht...isch ni wük erhousam gsi.

Hüt heimer natürlech no z'absolute "must" vo Victoria gmacht - The Butchard Gardens. Da chani ni wük viu drzue säge....meh eifach Biudli ufelade...

Summer

So, bi üs isch dr Summer iz ou acho - bzw. ds schöne Wätter. Warm ischs no ni würklech.....ig bi natürlech scho ume chrank...has z'guet gmeint mitm schöne Wätter u ha z'Gfüeu gha ig chöni iz ou im T-Shirt umeloufe (obwous no im Puli fasch z'chaut isch gsi). NeoCitran isch aber ja mitlerwile ä Nahrigsbestandteil vo mir u drum bini überzügt ig bi gli ume gsung ;-).

S'isch hie eifach chli tricky mit däm Wätter. Ou wes am Morge z'aueri schönschte Wätter isch muesmä ä Rägäschirm une Jagge mitnäh, wüu s'cha hie innerhaub vore Stung änderä u wäuts wüescht si (isch de wük ke Witz....ha geschter dr Fähler gmacht u ke Schirm mitgno - das passiertmer sicher nieh me!!!!). Cha aber ou huerä grusig si u am Nami isch T-Shirt Wätter...

Passiert isch süsch ni viu...Schueu isch ganz gmüetlech. Si heimi zwar iz höchschte Level ta, aber s'isch ganz gäbig....mir si eigentlech di ganz Zit nume am Diskussione füehrä. Mini Klass besteit us 3 Lüt - u eini isch hüt grad abgreist, auso simer iz nume no z'2....

Vori hani grad no ganz ä böse Unfau gseh....gloub dä Lüt geits no aune guet, aber d'Outos (ä Porsche une Mercedes - u s'si ni d'Standardusfüehrige gsi wi jedä het....) dr Porsche het ke Kofferrum me gha u dr Merz het fang bi dä Vordersitze agfange... Erstuntmi ja erlech gseit ni dases ni meh so bösi Unfäu git hie....ha iz mittlerwile usegfunge dassi ä Gschwindigkeitsbegränzig vo 50km/h hättä, aber schetzigswis isch hie kenä unger 80 wener no hurti wott vor rot über d'Chrüzig (inkl. mim Homestay-Mami - drum gani iz nüm mit ihre furt, das brucht z'viu Närve). U si hei haut hie so komischi Verchehrsregä dasme immer cha rächts abbiegä (ou we rot isch!!!!) - wemä aber haut ni luegt passierä när so sache wi hüt....schad ums Gäud.

Si hei ämu viu Fürwehr mit sehr sehr sehr viu Lärm u Blauliecht gha (isch äuä äs wäutwits Phenomen ;-))).

Passt ni zu mim hütige Unfauthema, aber ha haut süsch keni Biudli gmacht die Wuche ;-). Isch dr Queen Elisabeth Park....ganz härzig, aber eifach aus izunet dasme glich ni gmüetlech cha pick-nicke...

Home-Party @ Prisca's

Geschter simer bi eirä deheim gsi. Isch ou ä Schwizerä u geit mit mir id Schueu. Eigentlech hetsi imne Hostel gwohnt gha, aber Hostels si hie absolut z'letschtä....auso ischsi bimne Kanadier izoge - mitme usgesproche guet ussehendä Nachbar ;-))). Uf au Fäu hetsinis geschter aui iglade zu sich hei...u het Züpfe gmacht - dir gloubet ni wi guet Züpfe cha si, bsunders nach 6 Wuche mudrigem Toast!!!!!!!

Hei de ämu richtige Caipirinha becho dert. S'si ou paar Brasilianer dert gsi u di wüsse natürlech vo was si redä wes um Caipirinha geit - auso si si Barkeeper gsi. U ig ha wük no nie sone guetä Drink gha - das wo mir ir Schwiz bechöme isch ä Seich drgäge!!!!!

Uf au Fäu heimer när Pizza i ofe ta u plötzlech isch aus vou rouch gsi.....äs isch z'sägä das hie i jederä Wohnig ä Füüralarm isch.... (Ig ha ja ou scho mini Erfahrig drmit gmacht hie i mim Homestay woni ha Pizza i Ofe ta. Dä Füüralarm reagiert nämlech scho wes komisch schmöckt - wases denn bi mir het ta....) U da ig nach mire Erfahrig ha gwüsst wasme mues mache das dä Alarm ni los geit hani aune öppis id Finger drückt wosi chöi dr Rouch verdränge.....mä gsets gloub rächt guet ufm Biudli...;-). Dä Alarm isch de Glücklecherwis ni los....

Schlussändlech hetsech usegsteut dases z'Bachpapier isch gsi. Das isch irgendwie mit Wachs beschichtet u darf nume bis zu 100 Grad brucht wärde - steit aber niene uf dr Packig....mir hei natürlech für üsi Pizza öppe 180 Grad gha u das hets ni möge lide...

Tja, hei ämu ä luschtige Abe gha u när beschlosse mitm Taxi hei z'ga.....das isch ä Fähler gsi. Taxifahrer hei hie prinzipieu gloub ke Ahnig weli Strass das wo isch. Üses Taxi het zwar äs GPS gha, aber dr Fahrer het leider ni gwüsst wimes bedient.....hallo, für was heisi de äs GPS??????? Si när wäuts lang im Züg umegfahre u s'isch dementsprächend ou tüür worde.....aber mir hei de när uf di fründlechi schwizerischi Art mitim gredt u gseit daser das ni cha mache.....hei de när ni so viu müessä zahle, aber geng no gnue!!!

BC Lions Football game

Am Donnschti simer äs ächt kanadischs football-Game ga luegä - u ig weis iz werum dasi Töffrennä lieber ha, da muesmä nume ufpasse wär z'vorderscht isch....football isch ja so öppis vo wirr....




Mir hei am Nami ir Schueu ä Lektion (d.h. 70 Minute) über d'Reglä gredt. Eigentlech hätti scho denn söue wüsse dases ganz äs komischs Spiu isch (bi nämlech scho denn ni drus cho). U womer de när si i däm riiise Stadium gsi (s'si 26'424 Zueschouer gsi u s'isch knapp d'Heufti vou gsi...) isch eifach niemer vo üs drus cho. U v.a. simer so wit wäg gsi, mä het grad erkennt das dert paar Lüt ufm Spiufäud si u meh ni....mitm Fäudstächer heimer aber när usegfunge das die no gar ni mau so schlächt bout si - heinis haut när meh uf das konzentriert ;-))






Si hei ämu feini Hot Dogs u Popcorn gha ;-).... U für d'Männer natürlech di berüehmtä Cheerleaderinne....wobi ig ja meh hätt erwartet, si si ni wük besser aus die womer bi üs ir Schwiz hei...

Vancouver Island

So, iz bini ume zrügg vo üsne Feriä i dä Feriä ;-). Auso nei, eigentlech isch ja das woni hie mache ni Feriä....aber ämu di 4 Täg ize sis gsi. D.h. eigentlech chönnti iz äs erholigs Wuchenänd bruche, mir hei so viu gmacht ig bi totau erschöpft....

Am Friti simer am Mittag los miter Fähre uf Vancouver Island. Z'Nanaimo heimer de üses Outo abghout u si richtig Port Alberni. Ungerwägs heimer de ä Zwüschestopp gmacht bi Wasserfäu. Wär eigentlech dänkt gsi so für 10 Minute, isch när öppe 45 Minute gange u isch scho fasch dunku gsi. Hei de üses Backpackers glich no gfunge - u nach langem Suechä ou ä Beiz (isch wit u breit di einzigi gsi, aber so abglägä dasmesä chum het gfunge).

Am Samschti simer witer uf Uclulete u hei dert mau im Bed & Breakfast icheckt - isch aber meh wines 5Stärn Hotel gsi. Ha no säute so nobel übernachtet u d'Ussicht usm Zimmer isch eifach super gsi. Ungerwägs simer bimne See verbicho wosi di wäutgröschte Wasserflugzüg hei - si si wük riiiiiisig!!!

Das isch d'Ussicht vo üsm B&B-Zimmer gsi - d.h. mä het am Morge chönne dr Vorhang zieh u vom Bett us dä Fischer zueluegä...

Si när scho diräkt ufe erscht Trail gange - s'het dert überau so Trails wome cha wanderä u haut so chli d'Umgäbig gseht. S'het üs scho denn überwäutigt. Ig bi ja absolut ni dr Natur-Mönsch gsi (süsch würdi wanderä u ni töfffahre...), aber ig gloub hie chame ni angers aus gärn wanderä ;-)).

Si ou amne Strand verbicho wo eigentlech u schön wär gsi. Ha när mau di angerä gfragt öbsi ou finge dases rächt derb schmöckt.....si hei när gseit ig söumi mau umcherä u ä Meter hinger mir isch eifach ä tote Seelöi gsi, auso ämu das wo isch übrig blibe drvo....

Geschter simer när ufe bis uf Tofino u hei nach 10 Minute gmerkt das das äuä di längwiligschti Touriste Stadt ufdr Wäut isch u drum simer när witer denä Trails nache. Si natürlech ou zum Long Beach - u dä isch würklech läng....11 km. Isch wäuts schön gsi, aber relativ früsch. Isch auso nüt gsi mit bade. Heinis när haut eifach chli i Sang gleit u ä Brönner igfange (isch ja ä super Auternative!!!). Si de nächer eifach vo Strand zu Strand u no chli i Rägäwaud.

Am Abe heimer när gfunge mir wei ga dr Sunneungergang luegä....si de am viertuvor 9i los (Sunneungergang isch am haubi 10i) u hei am viertuab 9i gmerkt dasmer dert womer häre wei nüt gseh....auso heimer gchert u si zmits düre Waud zumne Strand abe (hüt würdis nüm mache, isch nämlech schins ä Puma ungerwägs dert). Uf au Fäu simer a däm Strand acho u s'het no grad so knapp fürnes Foti glängt...

Hüt simer ufne Whale-Watching Tour - ändlech!!!!!!!! U äs isch eifach absolut z'überwäutigendschtä Erläbnis gsi woni je ha gha. Si u nöch vome Buckelwal gsi u hei däm zuegluegt winer dert isch umegschwaderet. Näbscht däm Wau heimer no u viu Seelöie gseh...u si üs. Mir hei haut sealion-watching gmacht u die hei people-watching gmacht ;-). Di si unmittubar näb üses Boot cho (das Boot an und für sich isch ja scho z'Erläbnis wärt gsi. Isch äs auts Militärboot, ä Zodiac, u wo äbä isch uscho das dä Wau dert umeschwümmt hets gheissä mir machi iz ä Speed-Run dert häre - si auso vougas mit däm Böötli häre gange u da isch eifach jedä R1 ä seich drgäge!!!!!!!!). Uf au Fäu sinis di Seelöie de ou nones Zitli nachegschwumme...

När heimer no Fischotter (gloub so heissesi ämu übersetzt) gseh u ganz viu Adler.

Aber äs isch ja so ungloublech chaut gsi - trotz dä sexy Azüg womer hei becho. Üse Guide het gseit s'sig Temperature wisi normalerwis im Novämber hei dert....isch ni viu über 0 Grad gsi...

Leider keni Bäre - ig weis, isch ja ou Whale-Watching gsi, aber aui angerä hei uf derä Tour ou immer Bäre gseh. Wahrschinlech bini de dr einzig Mönsch wo isch so lang z'Kanada gsi u ke Bär het gseh....

Häppi 21i!!!!

Iz weisi ämu das das Jahr nume no cha besser wärde. Mi Tag isch no nimau 2 Stung aut u ig ha scho viu erläbt.

Agfange hets eigentlech wider imne Club mit somne huerä müehsame Chafli-Siech (natürlech ä Brasilianer). Glücklecherwis hani när gmerkt dasi chli sött pressierä wüus süsch nüm ufe Bus längt für hei. Auso heimer di Herrä la stah u si los gseklet - s'hetsech aus relativ blödi Idee usegseut nach diversä Bier u Drinks (Bier isch 3$ gsi u d'Drinks 3.75$ - da muesmä scho zueschlah!!!) u mit Ballerinas wo Blaterä gäbe no wöue 4 Blocks zum Bus z'seklä - i 9 Minute!!!. Natürlech, wi hätts ou angers chönne si, sobaudi ume Egge bi cho isch dr Bus gange. Auso hani när im Oberghetto vo Vancouver 30 Minute ufe nächscht Bus gwartet u ha no mini letschtä 2$ irgend amne Junkie gäh... Da ig aber ja jedä Morge ar Pennerkolonie zueluegä weisi iz wime mues härehocke das eim niemer blöd amacht - auso hani das gmacht u ufe Bus gwartet - u di ganzi Zit a mi Nutella-Toast dänkt woni de deheim ha....ischmer när chli liechter gfaue.

Bi ämu heil (auso ja, eifach mit paar Blatere) hie acho u gniessä grad mi Toast ;-). Fötelis fouge de no.....für die no ufez'lade bini grad chli z'gschafft...;-))

Auso, häbet ä wunderschöne Tag - ig ga iz mau iz Bett ;-).

Mersi

Ig gloub s'isch mau Zit zum mersi sägä für au öii liebä Kommentare!!! Ig fröiemi immer wäuts öppis vo öich z'ghöre - ou über d'Mails natürlech. U gibemer müeh öich ou zrügg z'schribe wenn immer müglech. Bi froh wedermi ou chli ufm Loufendä hautet...!!!

Ha iz sogar ä TV-Sender gfunge wo aui Euro-Spiu übertreit wärde - isch fasch wi dr Schwizer, nach dä Spiu hets no Interviews u so. Leider chumi äuä ni wük drzue di Spiu de ou z'luegä wüu bi üs ischs so um di 9i am morge we das Ganze bi öich statt fingt ;-).

Hüt hani fang z'speaking gha vo mine Advanced Prüefige. Isch ni so schlächt gsi, aber hätt chönne besser loufe. Mi Partner het leider ni verstange wasi ha wöue sägä, aber ig gloub s'isch weniger am Änglisch glägä aus meh am Inhaut an und für sich....wahrschinlech wärer ou ni drus cho wenis uf dütsch oder besser gseit holländisch (isch ä Dutch-Guy ;-)) hätt erklärt - s'isch eifach am Inhaut gläge. Aber är mues ja ou ni drus cho, di Expertä wei eifach au di Wörter ghöre wosinis i dä letschtä 4 Wuche hei itrimmt ;-)).

Bi üs isch ja wou grad so öppis vo beschissnigem Wätter.....hei sogar dr Rekord broche für di cheutischte Temperature wosi hie z'Kanada je hei gmässe im Juni . Eh ja, so langs nume no di Wuche isch während dä Prüefige ischs mer ja glich, aber ig befürchte s'duuret no chli lenger...

Prüefigsvorbereitig...

Ds wär de was mir hie unger seriöser Prüefigsvorbereitig verstöh ;-).

Nei, da d'Prüefige ja ersch nächscht Wuche si, heimer gfunge chöimer das Wuchenänd no chli ga fiire... Heinis de am haubi 8i (!!!! weme speter geit muesme no lenger astah, hei scho so öppe 20 Minute gwartet für ine) ufe Wäg gmacht. Hei währendem astah festgsteut das aui angerä wo si agstange ou Schwizer gsi gsi u de hetsnis scho chli afa närve....ig meinä geisch so wit wäg vor Schwiz u när si eifach nume Schwizer dert. Womer de si dinne gsi heimer festgsteut das näbscht dä Schwizer eigentlech nume Lüt dert si wo Polterabe hei.... Heinis haut när mit denä abgäh u s'isch de no luschtig worde... - wemesech dra gwahnet het das die eifach vou d'"Chaflis" si. Kanadier chöi eifach ni mit eim redä ohni dassi eim chafle....aber äs isch eifach schins so, di si dert düre wi d'Brasilianer...di mache das glich (extrem gwöhnigsbedürftig...). Aber uf au Fäu isch ja ize klar das ig nie wirde ä Kanadier hürate!!! - ig weis wisi Polterabe fiire u de hört das Ganze ja scho uf bevors het agfange!!!

Ja, di Wuche isch süsch eigentlech ni viu intressants passiert...abgseh drvo dassimi geschter vou hei verarscht. Bi ga ä Schlafsack choufe u hami natürlech dert la berate - si hei grössi small, regular u long. Aus isch i Grössine agäh woni ni kennä. De hani haut so einä gfragt u dä het när gseit ig müesi small näh. Auso hani das gmacht u bi hei (dr Wäg vo mim Homestay zu däm Shop isch öppe ä Stung). Deheim hani när gmerkt das dä Schlafsack viu z'churz isch (u ig bi ja wük ni gross, aber är isch z'churz gsi)...auso hanimi nomau ufe Wäg gmacht u bi dä Schlafsack ga umtusche.... - das wär de so das gsi woni am Samschti ha gmacht.

Ah ja, irgendwie hani immer das Glück dasi i di unbeliebtischte Klasse chume. Isch scho z'Niderwange ir Schueu so gsi, isch im Gymer när ou witergange u iz hie ou wider. Am Friti isch d'Lehrerä vo näbädranne 3mau cho reklamierä wüu d'Jungs us üserä Klass z'lut si (hei mündlech simulations Prüefig gha, drum isch d'Wendy ni i üsm Klassezimmer gsi) u am schluss isch no dr director cho.... Blöderwis chumi ire Wuche de i die Klass vo derä näbädranne - u si schint scho süsch ni di nettischti z'si - iz wosi weis dasi i däm Cambridge Kurs bi gsi wirdi uf au Fäu ni grad ihri Lieblingsschüelere si....tja, so geits haut.

BBQ @ Wendy's

Di Wuche het eigentlech agfange wine letschti Wuche Cambridge Kurs mues afa - mitme Barbeque bi üserä Lehrerä ;-). Si het üs au zu sich hei iglade für nä Grillparty...mit auem Drum u dra natürlech - Cheddar Nachos (übrigens 100mau besser aus die im GutGelaunt ;-)), Bier, Hamburger, chli Salat umne originau kanadische Countrysänger!!!

Si haut eifach bi ihre deheim gsi - ha übrigens dasmau ou chönne Fötelis mache....isch haut eifach sones Hippie-Hus. U we öpper mau hie isch u ke Zit het fürd Rägäwäuder z'Tofino - göt eifach zur Wendy i Garte, s'gseht öppe ähnlech us ;-))

Ds isch äbä ihre Garte - oder ä chline Teil drvo. Zmitsdrinne, dert wo d'Jungs stö hets none Teich mitme Brüggli...

Ds isch äbä dr Sänger gsi. U nachdäm mer äuä aui Nachbare fürchterlech hei gnärvt miter Country-Musig simer inezüglet...

...u hei dert witer Musig glost - wime gset miterä rächt "chline" Soundalag. Wahrschinlech isch z'Bärn im Usgang d'Musig ni so lut wisi am Mänti am Abe bir Wendy deheim isch gsi. Het ämu rächt pfiffe ide Ohre när...

Isch haut würklech wini gseit ha äs Hippie-Hus. Aber wäuts gmüetlech. U ig hamers ja ni chönne vorsteuä, aber dr Herd u Bachofe ufm Föteli obedranne funktioniert tatsächlech no!!!!

Ds wär de d'Wendy

U zu ganz vorgerückter Stunde hei de d'Jungs nones Tänzli versuecht....s'isch aber meh bimne Versuech aus bi süsch öppisem blibe...

Uf au Fäu heimer hüt au id Schueu müessä. Bzw. am Morge si nume d'Froue dert gsi (isch ja klar gsi...) u d'Männer si de ufe Nami cho...

Eh ja, mir hets ämu no so passt d'Wuche mitme Grillfescht azfah... Leider isch hüt sehr be**** Wätter gsi. S'het us ströme grägnet u s'isch knappi 12 Grad gsi. U s'gset ni besser us füre räscht vor Wuche. Si immer no chli am früüre hie, hättsech glich scho bau glohnt warmi Chleider z'choufe..;-)

4. Wuche

Ig weis, s'isch langsam nüm so spannend i mim Blog. Aber passiert haut im Momänt grad ni so viu nöis. Da ig im Momänt ke Zit ha für Usflüg - u de när ke Gäud me ;-) - wirds äuä nächschtens ni besserä - excüsée!!

Hüt simer zum Burnaby Lake. Hei sogar dra dänkt Tüechli u öppis z'Ässä mitznäh, wüumer ja de dert lenger si u gärn chli möchte härehocke. Ja usm gmüetlech härehocke isch nüt worde, s'het nämlech niene äs Plätzli ha zum hocke. Entweder isch Sumpfgebiet gsi oder Waudwäg.....auso simer dr ganz Nami desumeglüffe u hei de irgendeinisch nach langem Loufe äs Fäud gfunge wosi hei Cricket gspiut u dert heimer de chli chönne härehöckle....isch natürlech sehr gmüetlech gsi u genau wimernis das hei vorgsteut....

Am Abe heimer när eigentlech wöue chli i Usgang - hei geschter äxtra Schue gchouft wüusi dert womer häre hei wöue sone stränge Dress-Code hei. Leider simer z'früe gsi - komischerwis, wüu z'früe si chame hie fasch ni. Mir si haut am 8i dert gsi u si hei ersch am haubi 9i ufta. De simer no ine Pub u hei so uf di haubi 10i wöue zrügg....u womer si cho hets gheissä mä mues ä Stung astah bisme dinne isch....u das isch hie überau so, ni nume i däm eintä Club. Äs isch auso ni lächerlech gsi dasmer eigentlech hei wöue uf di 8i ga. Wüu aus was nach 9i isch, chame hie vergässe - ussert mä steit gärn a!!!

Uf au Fäu simer de när chli derä Club-Strass entlang glüffe u när hani zwöimau müessä luegä - hami auso ni girrt. Ha dert einä troffe woni vor 2 Mönet ar Geburiparty vore Kolegin ha gseh.....söu no einä sägä Vancouver sig ä grossi Stadt u d'Wäut sig riiisig. Isch rächt komisch gsi, loufsch haut so dür d'Strass u triffsch einä wo ir Schwiz fasch näbdr wohnt....u das aus zuefälligerwiis....

Si ämu de när nüm witer, sondern no hurti i McDonalds u när hei. U wüui iz so früe hie bi, hani haut no hurti mi Blog-Itrag gmacht...