Rägäzit

Mir si äuä mitlerwile vou id Rägäzit inegfahre. Hei sit 3 Täg duurräge. Vovomer 2 Täg im Zäut hei verbracht….ni wük gmüetlech we aus triefend nass isch. Uf aus ufe ischs u huere chaut. Das heisst d’Sandra u ig hei Jeans anne, längermlegi Puline u Faserpeuze – äs isch 24 Grad. Fragetmi auso ni wini das ir Schwiz ume ushaute. Vo 37 uf 24 isch fang 13 Grad ungerschid u wemer de hei chöme ischs nomau 24 Grad ungerschid….mir wärde äuä stärbe!!!!!!!

Mir si nach Brisbane witer uf diräktem Wäg nach Surfers Paradise. Isch ja eigentlech öppis gsi woni mi fasch am meischte ha druf gfröit. U ig mues sägä äs isch tatsächlech äs Paradies – ämu zum Shoppe!!!! A Strand heimer dert leider ni chönne wüus eifach grägnet het…;-(.

Wi gseit – es Shopping Paradies!!!

Drum simer ou nume ei Tag dert gsi u när witer uf Byron Bay. Dert isch u härzig gsi u sogar schön Wätter. Hei ämu a Strand chönne u eifach mau ume chli dusse si. Vo dert us simer när witer (ke Ahnig me wo häre – isch ja ou scho 4 Täg här) U de hets de ume mau grägnet. Wüu aber am nächschte Tag sooooo schön u heiss isch gsi simer a Strand (heinis veiechli verbrönnt) u am Abe när ufne Campingplatz u us luter euphorismus heimer grad zwe Nächt buechet für zum zäutle. Hei de z’Zäut ufgschteut u no wöue ga ichoufe u när het üses Outo ke Wank me gmacht. Aber nimau me äs mini lisligs Grüsch isch vom Motor me cho. Es isch ämu ni lang gange heinis scho zwe Männer wöue cho häufe u ä dritte hätsech ou scho ufe Wäg gmacht gha (aber sech när umentschide wüu scho zwe si dert gsi – heteris de speter gseit gha, isch e Schwizer gsi). Si hei de aber beid ni chönne häufe u drum hani am Outovermieter aglüte u de het när dr Oustralisch TCS verbigschickt. S’hetsech de usegsteut das d’Batterie tod isch gsi…. Ig möcht aber no drzue säge dasmer de ni stundelang no hei Musig glost oder so…. Mir hei geng wi geng üsi Luftmatrazene ufpumpet u när churzum abgsteut. Leider hets dasmau ni glängt gha. Dr Herr TCS hetnis de ämu boosteret u iz funktioniert aus ume prima. Denn ischs ou no 37 Grad si….
Am Abe simer när ga choche u chum heimer z’Ässe ir Campkitchen ufm Täuer gha hets afa rägne wi öppe am 1. Greenfield (die wo si dert gsi wüsse dases ni wük agnähm isch). Mir hei de ghofft das üsi Schlafseck im Zäut troche blibe….wassi de us irgendemene Wunder ou si blibe.

Wüumer am nächschte Tag ni hei chönne ga bade, simer när i Chino ga Australia luege. Ussert üs hets no öppe 8 Rentner im Chino gha. S’isch aber eine vo de beschte Fiume woni je ha gseh (mitm Hugh Jackman under Nicole Kidman). Me mues eifach viu viu Nastüechli mitnäh….;-)

Iz simer scho churz vor Sydney u hei us Rägägründ ume e Cabin gmietet.

Süsch gits äbe gar ni so würklech viu z’sägä…..mir si no am öschtlechsche Punkt vo Australie gsi. Leider ou dert ni wük guets Wätter, aber isch no härzig gsi.

So gsehts us wemer aube gmüetlech churz vorem Räge Znacht ässe…

Z’einzige Hard Rock Cafe in Australie – Surfers Paradise



Dr öschtlechscht Punkt

Fraser Island und Brisbane

Mir si sit geschter z’Brisbane im Hotel u drum chumi ume mau drzue öich öppis z’schribe. Üs geits immer no wunderprächtig – auso eifach solang mir ni dra dänke dasmer i 16 Täg scho ume hei müesse……

Bi letschtsmau im Blog bi Fraser Island verblibe. Di Insle besteit zu 100% us Sang, d.h. me cha nume mit 4x4 Outo dert häre. Hätt ja u gärn so mitme u huerä Offroader dert über di Insle wöue fahre, aber isch leider viu z’tüür gsi säuber eine z’miete. Drum heimer när ä All-Inclusive Tour buechet – somit isch z’Risiko dasmer z’Outo müesse usgrabe um einiges gsunke. Si auso dert übere u s’hetnis scho mau agschisse. Üse Guide hetnis so ine Waud gschickt u gseit womer düre müesse u är warti de däne mitm Zmittag uf üs (natürlech ischer ni glüffe…..). Uf au Fäu simer glüffe u glüffe u glüffe (hätt 45 Minute söue ga weme langsam louft). Mir si aui rächt schnäu glüffe u nachere Stung immer no niene gsi. Irgendeinisch heimer de ä Carpark erreicht u nach langem überlege vo wo dasmer das kenne heimer de gmerkt dasmer im Kreis si glüffe. Wit u breit isch üse Guide niene gsi. Hei de när ä angere Typ vo dere Organisation gseh u däm mau gseit är söu üse Guide afunke. S’hetsech de usegsteut dasnis dr Guide i di fauschi Richtig het gschickt gha!!!!!!! Äs isch ä witeri Stung gange bis dr Guide mitm Zmittag ume bi üs isch gsi u het när ou i ströme afa rägne…..

Am 2ä u 3ä Tag isch aber scho viu besser gsi u hei wük u schöni Orte uf dere Insle gseh u si sogar überne Sanddüne glüffe.

Hie bini ungerwägs über d'Sanddüne

U hie gsehtme d'Sanddüne vo obe..

Vo dert us simer när witer richtig Brisbane u nach paar Zwüschestopps i Australia Zoo. Für die wo ni wüsse was ds isch – ds isch dr Zoo vom Crocodile Hunter Steve Irwin (wo vom Roche isch gstoche worde u de isch gstorbe). S’hetnis no rächt fasziniert. V.a. wi är dert witerläbt u wi ou aui Australier (heimer ou scho vorhär gmerkt) extrem stouz si uf ihn. Zersch hetnis dr Zoo säuber ni so umghoue, aber hei de no chönne ga Elefante füetere, Koalas strichle u Kängurus füetere……isch no es speziells Erläbnis gsi.

Wüus de denn nachm Zoobsuech so schöns Wätter isch gsi simer natürlech ufe Campingplatz mit üsem Zäutli. Si mau iz Bett u nachere Stung ufgwacht wüus so häu isch gsi – vo de Blitze. När hets afa gwittere winis no nie ha erläbt!!! Im Zäut ischs ä rächt negativ spezielli Erfahrig.

Vo dert us simer när witer hie uf Brisbane. Hei natürlech z’Hotel ersch 2 Täg vorhär wöue bueche u s’isch restlos aus usbuecht gsi. När simer ines Tourist Office u hei die gfragt u di hei gmeint s’sig kes Problem, si machi das für üs….bissi im PC hei gseh das aus usbuechet isch. Si heinis de für hüt per Zuefau no chönne ines Hotel inebueche. S’isch u günschtig gsi u drum heimer rächt angscht gha wases fürnes Loch isch. Si de hie acho u positiv überrascht gsi. Üses Hotelzimmer isch eigentlech e 2ähaub Zimmer Wohnig mit Chuchi, abtrenntem Schlafzimmer, Gschirrspüeler u Wöschmaschine inkl. Tumbler.
Hei de geschter widermau ä Shopping-Tag igleit u gseit mir gö de hüt hie ad SouthBank ga bade – das isch sone künschtlech agleite Strand zmits ir Stadt. Si hüt am Morge auso los – leider no hurti imne Lade blibe hange, aber när glich witer ad SouthBank. Das wär de dr Momänt gsi woni ha gmerkt s’wär vilich glich guet weni mau ume müesst schaffe u mis Hirni chli bruche (zu mire Verteidigung muesi säge ar Sandra isch z’gliche passiert!!). Si de äbä i di SouthBank glüffe u was merke ig Höuzu?!?! Mini Bikinihösli si no im Hotelzimmer!!!!!!!!!!!!!!!!!!!!!!!! Was vilech ou no wüssenswärt isch, d’SouthBank isch öppe 45 Minute vom Hotel wäg, isch auso nüt gsi mit hurti Bikinihösli hole.

So Sache passiere üs hie eigentlech andurend. Entweder vergässemer dr Gaschocher zum choche, oder z’Wasser fürd Teigware, oder ig probiere dr Chüeuschrank miter Outofernverrigelig z’bschliesse (het ni klappt)…. Me merkt auso guet das mir hie eigentlech ni viu usser wük nüt mache ;-)))

Ou süsch augemein passiere üs komischi Sache. Eismau hetmi eine gfragt wini de ar Sandra mögi nacheloufe wüusi doch so gross isch, da müesi ja immer springe….. U eine hani müesse aklimpere wüuer fasch ni het chönne gloube dasi so längi Wimpere ha. U das si Lüt wo eifach ufdr Strass a eim verbiloufe…..

Nöis vo üs

So, ig schribe iz eifach mau ume chli füre Blog….vilich chöimerne ja de gly mau ufelade.
D’Sandra u ig hei ja eismau ä ganz beängschtigendi Situation gha…..mues hurti chli ushole. Si ufme Camping gsi u hei natürlech für zwe Nächt buecht wüumer so viu Zit hei….leider muesi iz säge. Hei nämlech ä Platz becho wo ar bräntende Sunne isch u zwar vom Morge am haubi 7i bis am Abe am 7i – d.h. me het dr ganz Tag ni chönne dert si. Dr Pool isch äbefaus ar Sunne gsi u s’het ke einzige Boum dert gha. Mir hei auso praktisch nüt chönne mache… Uf au Fäu heimer denn 36 Grad im Schatte gha. Am Abe simer id Camp Kitchen zum choche….dert isch ou z’Thermometer ghanget. U d’Camp Kitchens si immer dusse, eifach überdacht aber süsch offe. Mir hei beidi längi Hose unes T-Shirt mit Ermeli angha (wüus so viu Viecher het wo eim stäche). Uf au Fäu hei mir beidi gfunge mir si grad froh um di Chleider womer anhei u s’hetnis no fasch chli gfröschtlet…. Äs isch üs de mau i Sinn cho ufz Thermometer z’luege u de hetnis fasch dr Schlag troffe…..mir hei 29 Grad gha!!!!! U s’isch de ni no heiss gsi wüu irgendwie d’Wermi no vom Nami isch gsi…definitiv ni.
Ig ha äbe dänkt ig warte vilich gschider no bis im Früelig bisi heichume…..wüu weni scho bi 29 Grad früre….wi wird das de süsch ar Wiehnacht?!?!
Mir hei aber geschter ou no äs angers luschtigs Erläbnis gha. Si bim einte Tourist Office gsi geschter u när si näbedranne so zwe zuchegfahre…. Mir hei üs ni grösser gachtet u si sich schinbar ou ni, s’wärnis ämu ni ufgfaue. Uf au Fäu simer zrügg cho u iz Outo igschtige u när hanget ä wisse Zedu ungerem Schibewüscher. Ig ha scho gmeint iz heimer ä Buess…..när hani mau chli gnauer dä Zedu agluegt……heine äxtra gfötelet….chöit süsch grad säuber läse…;-)


Z’Dumme isch ja gsi dasmer eigentlech genau uf dä Bargara Beach Camping hei wöue (wüusi üs dä hei Empfohle im Tourist Office). Heinis aber de umentschlosse u si ufne angere.
Am Abe simer de ad Turtle Rookery. Dert hetme chönne luege wi d’Schiudchrött a land chöme u d’Eier lege. S’isch de scho rächt fischter gsi womer i däm Turtle Visitor Centre si acho u hei grad diräkt mitme Ranger a Strand chönne. U chum simer dert unge gsi isch ou scho sone Turtle usm Wasser cho. Ha ja zersch gmeint s’sig ä schlächte Witz…..dä Schiudchrott isch tatsächlech ä Meter läng gsi u het eifach usgseh wine rise Feus. När isch dä dr Strand z’deruf u het obe agfange äs Loch z’grabe. Dr Range het när hurti schnäu (ohni dases dä Turtle het gmerkt) ä Taschelampe iz Loch ta u när heimer chönne luege winer Eier leit. Ganzi 135 Stück sis gsi. Wüu dä Schiudchrott aber z’weni wit ufegschnagget isch, heimer nachdäm d’Frou Schiudchrott z’Loch het zuegrabe u ume abe iz Meer isch, müesse d’Eier witer ufe verlege. Eini vo de Rangers het när äs nöis Schiudchrottegenähms Loch grabe witer obe u di angeri het d’Eier ume usgrabe. Jede vor Gruppe het när 3 Eier id Häng becho u die müesse ufetransportiere – mir hei auso quasi denä Schiudchröttli z’läbe grettet, bzw. ermüglecht. Wüu we das Näscht dert unge wär blibe hätses chönne wägschwemmä.

U hie no mini 3 Schiudchröttli woni ha grettet ;-))

Hie gsehtme d’Grössi vo däm Schiudchrott. Si heine gmässe u är isch auso wük 99cm läng gsi u 100kg…

Iz simer z’Hervey Bay u hei grad ä 3tätige Trip uf Fraser Island buechet. Ds isch ä Insle wo nume us Sang besteit u isch drum ou 4x4 pflichtig. Wüumer aber ni äxtra nones angers Outo hei wöue miete – u üs de v.a. ni wie säuber usm Sang usbuddle wimes vo Paris Dakar kennt gömer iz so ufne gfüehrti Tour…. Mache de so gli wi müglech ä nöie Blog mit nöie Fötelis u so…

Hie isch no d’Ussicht womer hei gha am einte Camping…Hei wük z’Zäut praktisch am Strand gha. Isch leider de ou aus vou Sang gsi när…

Damitmer ou immer guet in Form si u so machemer flissig Yoga – haut ohni Matte drfür uf spitzige Steine…

Cairns bis Mackay

So, iz chumi ändlech ume mau drzue öich z’schribe…..sorry, ig weis…isch ni z’gliche wi woni bi z’Kanada gsi. Aber hie muesme scho froh si weme mitm Natel empfang het…geschwige denn Internetzuegang.
Ja, mir hei iz scho u viu erläbt. Si zimli gnau zwe Wuche iz ungerwägs richtig Syndey, resp. eifach gäge Süde zue. Vom Unwätter simer bis ize verschont worde. Si aber geschter glich ine Cabin ufm Campingplatz. Ds isch sones chlises Hüsli mit Chuchi, Bad u Bett. Grundsätzlech ischsmer glich wes rägnet ir Nacht, aber bi üsem Zäut weisme eifach ni wenn dasme de grad wäggschwemmt wird ;-). Uf au Fäu isch das äuä dr erscht Camping wo Wireless het, drum nützemer das grad us.

Si vo Cairns us no chli i Norde uf Port Douglas gfahre. Dert heimer de grad ä Tagesusflug ufz Great Barrier Reef gmacht. D.h. mir si mit somne rise huerä Schiff zure ganz chline eifache verlassnige Insle usegfahre u hei dert Schnorchuequipment becho. Hei de dr ganz Tag chönne ga schnorchle u eifach uf derä Insle si. Das wird äuä nach wi vor einä vo dä Höhepunkte si vo mire Reis hie (fasch wi z’WhiteWater Rafting z’Kanada ;-)). S’hetmi wük totau umghoue….v.a. womer de amne Schiudchrott si begägnet. Wäge Quallegfahr heimer denn ou so härzigi obersexy Azüg müesse alegä ;-)…gsehts de unge uf de Fötelis…

Das isch di einsami Insle gsi ufm Great Barrier Reef usse...

Dä heimer troffe bim schnorchle...

Das isch dr Azug woni ha drvo gredt...

Vo Port Douglas us simer de mau no chli witer i Norde uf Cape Tribulation, aber när de ou grad wider uf Cairns, resp. dranne verbi u mitme Stop z’Kuranda – das isches Dörfli zmits im Rägewaud – uf Innisfail.

Das isch dr Bahnhof vo däm Dörfli zmits im Rägäwaud...

Dert simer de ume zwe Täg gsi u hei eifach mau nüt gmacht (wasmer eigentlech so jede zwöit Tag mache ;-)). Äs isch eifach immer no extreeeeeeeeeem heiss hie. Ig wott ni jammere, mir gfaut das – solang mer nüt müesse mache. Rekord isch gsi dasi am morge am haubi 6i bi ufgwacht (nachdämi ersch am 12i iz Bett bi) u’s eifach nüm ha usghaute im Zäut wüus sooooo heiss isch gsi. Si de irgendwie am haubi 8i vom Zäutplatz uscheckt….

Mir hei de witerwöue i Undara National Park, dert hätts so auti Lavaström….leider ischs u tüür u wär 200km iz Landesinnere gsi. De heisinis imne Visitor Centre gseit mir söui i Paranella Park. Mir hei ke Ahnig gha wases isch, aber si de eifach dert häregfahre. Womit mer de bim 2. Höhepunkt vor izige Reis si. Das isch ä Park wo vomne Spanier (wär üsch aus Europäer….) isch gmacht worde. Verzeuenech iz ni di ganzi Gschicht…..gieng z’lang, u würdnech ja vilich glich ni intressiere ;-). Uf au Fäu het dä i däm Park äs Schloss bout…. Das isch vor 75 Jahr gsi u mitlerwile gseht das rächt heruntergekommen us, aber ufne u schöni Art….isch aus so mit Moos überwachse u wäuts härzig eifach.

Dert heimer de ou ä Schwizere une Dütsche troffe u si di nächschte 3 Täg mit denä witergreist (leider isch geschter uscho dassi ke Gäud me ufm Konto het u drum muessi diräkt heiflüge u ihri Reis abbräche….!!).

Mir si de uf Airlie Beach. U hei dert nomau ä Trip ufz nöche Riff gmacht. U si denn o zum Whitehaven Beach. Äuä ou öppis vom schönschte woni je ha gseh!! Das isch ä Strand wo eifach wiss isch….u s’isch schinbar ganz einzigartige Sand wüu dä ou ni wermer wird aus 26 Grad….me cha auso ganz guet ohni Schue dert druffe loufe. Z’Wasser dert isch eifach türkis gsi….u drum hetme ou grad d’Roche u d’Riffhaie gseh wo ä Meter näbe eim si düregschwumme ;-)). U womer dert a däm Whithaven Beach si gsi hets no sone Lookout gha wome het müesse häreloufe. Heimer natürlech gmacht – trotz 36 Grad im Schatte. Ha de beschlosse dasi das ganze im Bikini mache, je weniger me anhet umso weniger schwitztme…..aber isch glich u huerä asträngend gsi (si ganzi 5 Minute zum loufe gsi!!!). D’Lüt heimi meh oder weniger komisch agluegt, aber so Sache si de eim aube ganz glich….

Nach üsere 5minütige Wanderig...

Am wisse Strand...

Dert heimer ou ume chönne ga schnorchle u dasmau heimer sogar dra dänkt ä Ungerwasserkamera z’choufe. Isch leider aube schad we bi jedem 3. Foti no ä Finger druffe isch….het glich paar kuuli gäh…

Hei irgendwenn zwüsche dem auem (ha leider ke Ahnig me wenn mer was hei gmacht, ha ou grad ke Landescharte bimer woni chönnt nacheluege….aber isch ja gloub ni so schlimm?!) ä Waterfall Circuit gmacht. Isch ou u schön gsi, leider heisi aber grad Dürrezit u drum hets fasch ke Wasser.

Ja u süsch simer hie vou üses Camperläbe am gniesse. Glücklecherwis hets de ni so viu huerä grusigs Gviecherzüg wini ha gmeint. Ha nume fang einisch ä ganz grusegi Spinnele gseh u süsch ganz viu angeri luschtigi Sache wi lüchtgrüeni Frösche, Kangaroos, Wallabies, goldegi Eidechsli, Geckos usw.

Chönnt no viu meh schribe, aber ig gloub öich intressiere v.a. d’Fötelis ;-). Ig tue die iz ni au dokumentiere….gloub s’isch so chli säubsterklärend….u süsch stahni natürlech für Frage gärn zur Verfüegig ;-))))

So, gniesset dr Glüehwy für mi u ig nime de none Ärdbeeridrink oder zwe fürnech ;-))

Das isch ä Paume vou Papageie....zmits ufm Campingplatz...

Sydney und Cairns

So, iz chumi mau ume drzue öich chli z’schribe. Si sit geschter hie z’Cairns….. Hei am haubi 8i am Abe üse Flug vo Sydney da häre gha u s’isch gsi wine Chlapf zum Gring…. Z’Sydney isch ja scho o sehr schöns Wätter gsi. Hei ämu i churze Hose u Shirt chönne umeloufe u hei das ou ganz agnähm gfunge. Hei de d’Ari no ufe International Airport bracht u si när ufe Domestic übere. Hei dert no chli im Billabong Shop umegluegt u si ufe Flüger. Hei ä ganzi Reihe für üs gha, isch super gsi. U süsch eigentlech würklech ganz ä agnähme 3h Flug. Hei scho gwüsst dases de z’Cairns chli wermer isch wemer usstige….aber ni sooooooo warm u füecht. Hei natürlech no Jeans u dicke Puli agleit (im Flüger isch chaut u hei ou üses Gwicht chli müesse abeschrube (ha natürlech widermau z’viu gha – wär hätts ou dänkt ;-)).
Si de när ufnes Taxi u hei gfunge s’geit eigentlech iz glich no so – si ja ou im klimatisierte Taxi ghocket…. Womer aber am Hotel si acho hetsnis fasch eis gäh. Wedernech weit vorsteue wis üs so geit, müesster mit vouer Skimontur iz Papilliorama oder im Däuhöuzli iz Vivarium u nones Wasserspray mitnäh dasdrnech no chli meh chöit befüechte.

Hei ämu hie äs super Hotel…..eigentlech fasch ä chlini Wohnig. Wemer usm Fänschter luege gsehmer eifach öppe ä Urwaud wo ir Hotelalag bout isch. Si de hüt mau früe ufgschtange – süsch hätts nüm fürs Hotelzmorge glängt. U einisch meh heimer feschtgsteut dases eifach extrem füecht isch hie obe. Si ga Zmörgele u när uf Cairns iz Zentrum glüffe (mit FlipFlops, Shorts umne T-Shirt wo eigentlech fasch kes Shirt isch wüu ni wük viu dranne isch). S’geit öppe 10 Minute bisme vore isch….mir hei öppe 20 gha u si pflotschnass acho!!!!!
Wüus haut so heiss isch simer dert vore meh oder weniger vo Shop zu Shop – isch ja aus klimatisiert zum Glück. Si de när ga Zmittag choufe u hie iz Hotel zrügg. U si sitem 1 wider hie u chöi nüm usm Zimmer use wüus sooooo heiss isch. Mir chöi nimau a Pool wüu di einzige 4 Ligistüeu natürlech bsetzt si u’s vorauem vou ar Sunne steit.

Aber ig wott ni usrüefe, mir gfauts hie so wit ganz guet. Hei scho üsi erschti Tour buechet für ufne ganz einsami Insle… Iz heimer hie no 2 Täg u när nämer de z’Outo u fahre no chli gäge Norde. U einisch müessemer de cherä wüumer ja de ume z’Sydney ände…

Zu Sydney gits ni so viu z’säge. Isch eifach haut ä typischi Stadt. Hei am erschtä Tag dert wäuts schöns Wätter gha, aber natürlech ke Meter wit überleit u si ga shoppe. Di nächschte zwe Täg ischs när rächt früsch gsi (das wärä de die gsi womer hei fürd Stränd iplanet gha…. Hei de ei Strandtag verschobe u si am 4. Tag no a Bondi Beach. Das isch wük super gsi. Viu surfer, Rettigsschwümmer uf JetSkis u eifach viu zum luege.
Ha de dert ou di erschte Erfahrige mit höche Wäue gmacht woni ha wöue d’Füess anetzä…..si hetmi grad umghoue u ig bi vo obe bis unge nass gsi u ha no lang speter Sang gfunge (wi das aube so mitm Konfetti isch ar Fasnacht ;-)).

Mou, da chunntmer grad no i Sinn wasmi sehr fasziniert het…. Si im botanische Garte gsi u dert si hunderti vo Flughüng gsi. U zwar umegfloge am häuliechte Tag…. Si gseh eifach scho us wi irgendwelchi Draculas. Aber isch no kuul gsi…

Bondi Beach vo witem...

Ja u süsch isch haut Sydney wi jedi angeri Stadt ou. (aui wo scho mau z’Vancouver si gsi wüsse das eh ke angeri Stadt a die härechunnt ;-))). Es isch wük ä schöni Stadt, aber si hei leider ke Ahnig vo öffentleche Transportmittu….mä chunnt eifach vor u hinge ni drus u drum louftme när trotz Wuchefahrcharte…

Eh ja, iz simer no chli hie z’Cairns u gö de gli z’Outo ga hole u när witer.

Äbe, hie wär de Batman…

Da heimer ma ganz ä abgspacte Drink gha….hetsech usegsteut das z’Lämpli im Plastikiswürfu nachdr Heufti vom Drink nüm geit…

Dä Pancakes bini natürlech nach wi vor treu blibe…

U das wär de no d’Hotelalag…

U hie churz bevorsmi gfluetet het am Bondi Beach

Camping

Mir si iz ja schones Zitli ungerwägs u bekanntlech hie am campe. Hei äs super Camping-Kit becho vo üsem Outovermier. Hei de nachme Zitli aber gfunge schlafe uf cm dicke Mätteli chas ni si u hei Luftmatratze gchouft.

So gseht üses typische Zäutlager us...

Nachdäm mer letscht Wuche eigentlech üse Tag ganz guet hei agfange, hets de im Tiefpunkt vor Reis gändet. Mir si uf Philipp Island gsi u am Vorabe no ga Penguin Parade luegä. Mä het leider ni dörfe fötele, aber me hätt eh nüt gseh. Das ganze isch so gange dasmer ane Strand si wosi hei wi Tribühnene ufgsteut (resp. si die fix dert). Das Ganze isch bi Dämmerig gsi. Hei de dert gwartet u wos scho fasch fischter isch gsi si Pinguine usem Wasser a Land cho u när übere Strand i ihri Hüsli gwatschlet. Vom Parkplatz us hetme so dürnes Visitor Center müesse u vo dert us zum Strand heisi so wi Brügge bout wome het chönne drüberloufe u de d’Pinguine beobachte wisi vom Strand här i ihri Hüsli loufe. U teilwis hätme chönne abelänge u grad ä Pinguin ipacke. S’si Fairy Penguins oder ou Little Penguins gsi (ke Ahnig wisi uf Dütsch heisse, aber s’si eifach di chlinschte Pinguine wos git – 30cm höch). Di si dert ou niene igsperrt gsi, di hei härechönne wosi wei u so si när ou paar bide Parkplätz umeglüffe u bau bis ufd Strass füre.

Am nächschte Morge simer de dr Phillip Island GP Circuit ga luegä (ein MUSS für jede Töfffahrer). Hei dert uf dem Rundkurs ä Füehrig gha u hei sogar ufz Siegerpodium chönne. Das isch rächt intressant gsi, dasme haut ou mau hinger di ganzi Sach gseht. Hei ou ufd Strecki dörfe – leider nume z’Fuess. Mitm Outo, resp. Streckebössli, heimer ni chönne wüusi grad ar Strecki säuber öppis gmacht hei. Hie ischs schins ou gsi wo dr Rossi isch im Medical Centre ibroche u dr Vertrag füre Teamwächsu zu Yamaha het ungerschribe. Und dr Checa het dr Streckerekord vo 333km/h…

Si nachdr Füehrig no iz Motomuseum u dert het z’Desaster eigentlech agfange – wüu d’Ari nämlech (welch o Wunder…;-)) ihre Föteler het la gheie. U zwar – wi chönnts ou angers si bi so Sache – diräkt ufz Objektiv, ds das när isch verchlemmt umer öppe nüm hei chönne mache dranne – weder alah no absteuä (isch klar gsi das si aui Föteli vom Rundkurs het gmacht, ig ha nämlech gfiumet).

Si de glich när witer u hei ä Campingplatz gsuecht u de ou gfunge (was hie ja ni so schwirig isch). Hei z’Zäut ufgsteut u üsi Luftmatraze af aufblase. Hei natürlech zu de Luftmatratze ä Adapter fürz Outo gchouft womer die när chöi elektrisch ufblase – wär ja süsch viu z’Asträngend. Womer di hei ufblase gha hani de gmerkt das mini äs Loch het (nach 2mau bruche)!! Isch aber nume äs Munzigs gsi u de heimer eifach äs Chläbi drüber gchläbt. Irgendeinisch simer iz Bett u am 12i bini ufgwacht uferä flache Matratze u bi äuä -30 Grad (mindeschtens…). Ha de di ganzi Nacht gfrore umi vor eintä Site zur angere chehrt fü z’merkä dases eifach immer u hert isch….. Irgendeinisch isch de Morge worde u de heimer aus erschts grad ä Luftere gchouft und ä Faserpeuzschlafsack ;-)).

Äbe, süsch klappt das mitm Camping rächt guet. Abgseh vom Dusche…..auso ämu bi mir chunnts aube no ni guet. S’het ja immer so sanitäri Alage. Meischtens si die ja am angere Ändi vom Campingplatz aus mir üses Zäut hei, aber mir hei ja Zit u loufe gärn u drum isch das ni so schlimm. Leider merki de jedes zwöite mau woni unger dr Duschi stah dasi irgendöppis ha vergässe – vo früscher Ungerwösch bis zum Badtüechli isches scho fasch aus gsi – wobi das mitm Badtüechli rächt blöd isch……!!!!!!!!!!!!!!!!!
Mir müesse ou nie üses Zäut suechä (isch ni so wi am Gurtefestival wo aus vou isch)….mir si meischtens di einzige wo äs Zäut hei u wärde somit äuä vo aune angere mit ihrne Motorhomes u Campervans bemitleidet.

U fausmer z'Zäut doch mau nüm finge, suechemer eifach nach üsere Wöschleine :-)

Ässe tüemer eigentlech aube rächt guet. Mir hei scho Pasta mit Tomatesosse, Pasta mit Pestososse, Curry Ris mit Poulet, Brathärdöpfu, Hamburger u Salat gha – u we das düre isch fats aube ume vor a ;-). Hei leider nume ei „Herdplatte“ bi üsem Gaschocher, u drum müessemers relativ eifach haute.
Si aber ou scho imne Motel ungercho…..s’het de glich iz ou mau grägnet u de isch campe ni wük gmüetlech. Das mit dem Motel isch aber ou ganz praktisch, de chame mitm Outo eigentlech fasch diräkt iz Zimmer ine fahre…..muesme nimau z’Gepäck wit trage…

Mitlerwile heimer erläbt wi überus gmüetlech dases isch wes stürmt. U weni säge stürmt de meini das ou – vorgeschter hets ir Nacht gwitteret…u zwar so richtig. U wo de z’Gwitter isch abzoge hets uuuuu huerä gluftet – üses Zäut isch nume no haub so höch gsi wi süsch wüus eifach aus het gäge Bode drückt. U nachdems de ufghört het lufte ischs no veiechli cho schiffe.
Am Morge isch när ume guet gsi – d.h. überus guet. Si eigentlech diräkt vom Schlafsack a Pool gläge….u hei de nach 2 Minute gmerkt dasmers nume no IM Pool ushaute wüus soooo heiss isch.

Ja u ize simer grad hie z’Sydney im Hotel acho u drum chani ou ume mau blogge. Si ize 5 Täg hie u när geit de d’Ari hei u d’Sandra (womer übrigens morn gö ga abhole) u ig flüge ufe uf Cairns….

Ig wär no necher am Kangaroo gsi, aber mi Reisepartner hets verschlafe denn z'fötele....

S'si Papageie.....gsehts ni so guet.

Hei mitlerwile ou d'Badesaison chönne starte...

S'git hie sogar Nadine Härdöpfle!!

U das isch no d'Ussicht vomne Campingplatz....